euskalkultura.eus

Eguna goiz hasi zen, hamabietan, aita Rodrigo Tupper-ek eman zuen mezarekin. Ondoren, euskal ereserkia jo zuten txistulariek Gernikako arbolaren kimuaren aurrean eta aurreskua dantzatu zuen  Maitane Uribe dantzariak. Euskadiren ordezkaria Txilen, Rafael Kutz Garaizabal, bertan izan zen.

Ondoren, Ariane eta Maitane txalapartari nafarrek erakustaldia eskaini zute eta Maitane Uribek Jota  zaharra eta Arin Arin dantzatu zituen, Angel Espinozaren alboka lagun. Ikusitakoarekin girotuta edo, bertan ziren gazte euskal-txiletarrak dantzara bildu ziren eta Zazpi Jauzi eta Esku-dantza dantzatu zituzten; Pilar, Raimundo, Aitor Xabier eta Angel "Gotzon" Espinoza txistularien laguntzarekin.

[Esku-dantza dantzatzera animatu ziren gazteak (argazkia GureEtorkiaEE)]

Giroa, elkarte antolatzaileetako iturriek agertu dutenez, oso ona izan zen eta jaian Euskal Herritik Txilera etorritako gazteak ere nabaritu ziren. "Lagun berri asko egin ditugu, gehienek Txilera etorri eta lana aurkitu duten gazteak. Pozik dira hemen beste euskaldun batzuk aurkitu eta herrimina arintzeko aukera izan dutelako".

New Yorkeko Eusko Etxeak ere apirilaren 20an ospatu zuen Aberri Eguna eta ia ehun lagun bildu ziren elkarteak antolatu zuen bazkari eta ekitaldira. Elkartea jendez lepo, pintxo dastaketa batekin hasi zen festa eta hiruretan Iñaki Bakedano presidenteordeak prestatu zuen bazkaria zerbitzatu zen. Euskal Herritik etorri ziren Kristina eta Kristina trikitilariek musikarekin alaitu eta girotu zuten jaia. "Primeran pasa genuen eta giro ederra lortu genuen", azaldu dio EuskalKultura.com-i Iban Ubarretxena elkarteko presidenteak.

[Jendez mukuru izan zen New Yorkeko Euzko Etxea Aberri Egunean (argazkia NYEE)]

[Kristina eta Kristina trikitilariek jarri zuten musika (argazkia NYEE)]

Miamin, elkartasuna

Giroa aparta izan zen baita ere Miamiko Euskal Etxearen Aberri Eguneko festan eta elkartasun ukituarekin gainera. Angulo familiaren Royal Palm Island-eko gunean bildu ziren Miamiko euskaldunak eta euren lagunak eta piknika egin zuten bertan. Egunak ederra izan zen, eguraldia eta janaria bikaina eta, elkartetik agertu dutenez, musika aukera zabala: Juan Luis Guerraren merengue eta bachata doinuek, trikitixa, Irizarren pianoa...

[Joseba Andoni Larrazabal, Enaitz anaiarekin eta Kristina Guenetxea Miamiko Euskal Etxeko kidearekin, elkartearen Aberri Eguneko jaian (argazkia MiamiEE)]

Elkarteak esker ona agertu die festaren antolakuntzan lagundu zuten bazkideei, oso bereziki Angulotar familiari, eta bertara bildu ziren guztiei.