euskalkultura.eus

Bilbao, Bizkaia. Migrazio ikasketak hezkuntza kurrikulumaren parte izatea da gai hau aztertzen duten adituen erronka nagusietako bat eta horrela izanik, Bilboko mintegian ere luze eta zabal jorratu zuten gaia. Topaketan, adibidez, Norvegiako kasua aztertu zuten. Han hasi eta munduko beste herrialde batzuetara zabaldu den Youth and Migration programaren bidez eskoletan emigrazioaren fenomeno historikoa aztertu egiten da, eta aldi berean gaur egungo immigrazioa ere lantzen da, mintegiko antolakuntzako kide Benan Oregik EuskalKultura.com-i azaldu dionez.

"Ikasleek nork bere zuhaitz genealogikoa egiten dute eta ondoren familiako kide bakoitza mapan dagokion lekuan kokatzen dute. Horrela, gehienek euren familian ere Norvegiatik joan egin behar izan zuten senitartekoak aurkitzen dituzte eta horrek egun bertara heltzen diren immigranteak beste era batean ikusteko aukera ematen die", azaltzen du Oregik. Esperientzia honek tolerantzia bezalako baloreak eta besteekiko errespetua sustatzen ditu, ikasle bakoitzaren bizitzarekin zuzenean lotura duen ariketa praktiko baten bidez. 

"Programa honen barruan egiten den beste jarduera bat Norvegiako emigranteek idatziriko gutunak gaur egungo immigranteek idazten dituztenekin alderatzea da. Horrela, Norvegiatik Ameriketara joan zen aitonak familiari bidali zizkion gutunak, adibidez, gaur egun Europan dagoen immigrante batek Afrikako familiari idazten dizkionaren antzekoak direla ikusten dute, antzeko kezkak eta beldurrak dituztela, alegia", aipatzen du Oregik.