euskalkultura.eus

Caracas, Venezuela. Caracasen da berriz ere Zinevasco jaialdia, Euskal Herrian egiten den edo euskaldunek munduan zehar egiten duten zineari eskainitako lehio berezia. Jaialdiak Eusko Jaurlaritzaren laburmetraien zabalkuntzarako Kimuak programaren ekarpena bildu izan du, eta baita ere lanak utzi dituzten hamaika euskal zinemagile, ekoiztetxe eta banatzaileen lankidetza, besteak beste.

Emanaldiak Cachao eta Los Galpones kultur guneetan egingo dira eta aurten, gainera, jardunaldi bereziak egingo dira Monteavila Unibertsitatean. Saio berezi hauen helburua unibertsitateko Gizarte eta Komunikazio ikasleei film hauetako planoak, gidoiak eta sekuentziak aurkeztu eta ikertzeko aukera ematea da, euren ikasketetan baliagarria izango delakoan, jaialdiaren koordinatzaile Vicente Corostolak azaldu duenez.

Emanaldi guztiak doakoak dira eta sarrera librea izango da.

'Los 4 McNifikos' eta 'Izarren Argia'

Euskal zine erakustaldia heldu den astelehenean, azaroaren 7an, hasiko da, Cachao Kultur Gunean egingo den lehen saioarekin. Emanaldiak 19:00etan hasiko dira, lau egunetan zehar, azaroaren 10a bitartean. Horrez gain, Los Galpones Arte Gunean beste emanaldi bat egingo da, azaroaren 8an, hau ere doan eta 19:00etan. Azkenik, Monteavila Unibertsitateko emanaldiak azaroaren 7an eta 21ean izango dira.

Laburmetraien atala lanez josita dator aurten: 42 labur; batzuk Kimuak 2010 katalogokoak eta besteak zuzenean zuzendariek, ekoiztetxeek eta banatzaileek bidaliak. Horietako batzuk dira, adibidez, Daisy Cutter animaziozko laburra --"Oscarretarako bidean da", diote antolatzaileek-- edo Los 4 McNifikos umorezko dokumental faltsua, 12th New York International Latino Film Festival jaialdian ere izango dena. Luzemetraien arloan bost lan izango dira ikusgai, horien artean euskaraz eginiko Izarren Argia, Saturrarango gartzelan gertatu zirenak jasotzen dituena, edo La buena nueva, Helena Taberna zuzendari altsasuarraren lana.

-Zinevascori buruzko informazio osoa (programazioa, ordutegiak, eta abar) jaialdiaren webgunean, hemen