euskalkultura.eus

Vitoria-Gasteiz. Hiru urte zeraman Japonian Jon Verastegui gasteiztarrak eta izan ere bertakoa du emaztea, Megubi. Orain, tsunamiak ekarritako egoerak eta isuri radioaktiboenganako beldurrak eraginik, babes neurri gisa, Japonia utzi eta Euskal Herrira itzultzea erabaki dute. Bertatik, ia soinean zeramatenarekin atera dira, informazio ofizialek radiazio mailari buruz ziotena entzunez, baina egoerak okerrago eginez geroz gerta daitezkeenak aurreikusi nahian. "Ez dakigu radioaktibitateak zer nolako eraginak izan ditzakeen epe ertain eta luzera", dio Jonek, "segurtasun gabezia handia dago".

Euren inguruan, japoniar batekin ezkondutako atzerriko senar edo emaztea daukaten bikoteetan, askok bide bera hartu dutela diote, kezka eta arrengura handia baita. Ahal duena, Tokiotik urruntzen ari da, hegoaldera, radioaktibitatetik ahalik eta urrunen.

Jon Verastegui, energia berriztagerrien alorrean lan egiten duen gasteiztarra izateaz gain, Tokyoko Euskal Etxeko lehendakaria ere bada. Euskal Etxea bi bat urtez ari dela lanean dio eta finkatzen lanetan ari direla. Egoitza oraindik ez daukatela eta zortzi bat bazkide finko eta hogei bat inguruko direla. Japoniatik ihes egite hau, atzerritarren artean ari dela ematen gehienbat esaten du, japoniarrek bertan segitzen baitute.

Elkarrizketa, osorik, jatorrizko gaztelaniaz, herenegun larunbatez Deia egunkariak argitara eman bezala, hemen topa dezakezu.