euskalkultura.eus

Pellegrini, Argentina. Erakusketak XVIII. mende hondarretik hasi eta XX. mende hasiera arteko 20 euskal jantzi tradizional biltzen ditu, xehetasunez berreginak eta detaileak ere ongi zainduta, egileak EuskalKultura.com-i adierazi dionez. Magdalena Mignabururen esanetan, "Euskal Herria eta geure kultura azaltzerakoan, hemengo euskal jatorrizkoen eta euskal jatorrizkoak ez direnen aurrean, euren arreta behar duzu erakarri, euren interesekoak izan daitezkeen gaiak azalduz, molde atseginean. Erakusketa honekin, Euskal Herria nahi izan diet azaldu bertan erabiltzen ziren jantzien bitartez, euskaldunek zer janzten zuten, zertarako, noiz eta non agertuz. Manikietan ezartzearekin batera, jantzi bakoitza Euskal Herriko mapa batean kokatu dut, nongo jatorria duen adieraztearren".

"Hurreratuko denak folleto bat ere errezibituko du, bertan ikusiko duena, edukiari buruzko informazioa eta oinarrizko zenbait gauza etxera eraman ahal ditzan, tartean zenbait webgune eta interneteko erreferentzia, EUSKALKULTURA.COM tartean. Horrekin batera ni neu ere bertan izango naiz, azalpenak ematen eta behar diren galdera guztiei erantzuten", esan digu Mignaburuk. Erakusketa prestatzen, bibliografia zabala, garaiko postal eta irudiak eta beste hainbat lekukotasun erabili ditu egileak. Aurretik ere ibilia da bera euskal erakusketen munduan, hala nola 'Euskal zantzua Argentinan: hezi eta ikasi memoriaren bidez' (La huella vasca en Argentina. Educar y aprender a través de la memoria) izenekoan eta, besteak beste, FEVA edo 'Euskal Argentinar Bazkun Alkartasuna' (euskal argentinar euskal erakundeen federazioa) erakundearen berrogeita hamargarren urteurrena zela-eta argitaratu zen 'Historia de la Federación de Entidades Vasco Argentinas' liburuaren egile ere bada.

Magdalena Migaburuk, bestalde, datorren astelehenetik, apirilaren 4etik, aurrera sarean egongo den bere webgune berriaren berri ere eman digu (www.mignaburu.com.ar). Bertan bere ibilbidea, lanak, ekarpenak, informazioa eta berriak islatuko dituela adierazi du.

Pellegrini-tik Pehuajó-ko Euskal Etxera

'Gure arropa-Nuestra ropa' erakusketa apirilaren 4ean eta 5ean egongo da zabalik Pellegrinin. lehenengo egunean, bertako agintariek inauguratuko dute eta bisitariak errezibituko ditu. Baita bigarrenean ere, baina arreta berezia ipiniz inguruko barrutiko eskoletako ikasleei. Horiei guztiei harrera emango die Magdalena Mignaburu berak.

Ondoren Pehuajó-ko 'Etxe Alai' Euskal Etxera pasatuko da erakusketa, bertako Aberri Eguneko egitarauko parte. Hori bukatuta, jantzi batzuk emendatu nahi lizkioke egileak erakusketari.

'Gure arropa-Nuestra ropa' erakusketa euren euskal etxean edo euren herrian hartzeko interesa izan dezaketenak Magdalena Mignabururekin komunika daitezke honako emailera idatziz: aurrera55@hotmail.com.