euskalkultura.eus

Birmingham, Ingalaterra. Jaurlaritzaren Kultura Sailaren baitangoa den erakunde honek ohar batean zabaldu duenez, “Euskara jalgi hadi mundura” zioen euskarazko lehen idazleak eta lehen idazle haren izena daraman Etxepare Institutuak zintzo heldu dio langintza horri. Iragan irailaren 30ean, Aizpea Goenaga Etxepare Institutuko zuzendariak eta Michael Whitby Birminghamgo Unibersitateko buruak sinatu zuten akordioak euskara eta euskal kultura ikaskuntza eta presentzia indartuko ditu Ingalaterran 2013ra bitartean. Xabier Paya bertsolari eta itzultzailea izango da hitzarmenean xedatutakoa betetzeaz arduratuko den irakaslea.

Etxepare Institutuko zuzendari Aizpea Goenagaren hitzetan, hitzarmen honek zuzen-zuzenean erantzuten dio Etxepareren helburu estrategikoetako bati: euskararen irakaskuntza, ikerketa eta erabilera nazioartean bultzatzeari, hain zuzen ere. “Euskara eta euskal kultura kanpora zabaltzea eta munduko komunitate ezberdinen artean euskara bultzatzeko misioarekin jaio zen Etxepare eta Birminghamgo Unibertsitatearekin egin dugun hitzarmen honen bidez, ibilbide horretan urrats bat gehiago egingo dugu”.

Birminghamgoa euskarazko irakasletza bakarra da Erresuma Batuan, eta bakarrenetakoa mundu osoan euskara eta euskal kultura goi mailako curriculum akademikoaren barnean dituztenen artean. Ikasleek euskara ikas dezakete karrerako lehen, bigarren eta laugarren urtean. Hirugarren urtea atzerrian pasatu behar dute derrigorrez, Erasmus programaren bitartez, baina kasu horretan ere euskara ikasten jarrai dezakete, hitzarmenak urte hori Gasteizen egiteko aukera eskaintzen baitu, euskaltegiko urte osoko matrikularen ordainketa barne hartuta.

Hizkuntza eskolez gain, ikasleek euskal gizartea eta kultura ezagutzeko ikasgai bat har dezakete, non Euskal Herriaren ikuspegi orokorra jasotzen duten ingelesez. Eskolez gain, hitzarmenak euskara  eta euskal ondarea sustatzeko ekintzak aurreikusten ditu, bai maila akademikoan, bai maila sozialean.

Larry Trasken funtsa

2009an, Birminghamgo Unibertsitateak Britainia Handian topa daitekeen euskarazko lan-bilduma handiena eskuratu zuen: Sussex-eko Unibertsitatean irakasle izandako Larry Trask hizkuntzalari amerikarraren ondarea dohaintzan eman zion haren alargunak. Bildumak ehun bat liburu biltzen ditu, Etymological Dictionnary of Basque edo The History of Basque maisulanen egilearen bulegoa betetzen zutenak. Liburuen artean euskal fonologiari buruzko eskuizkribu bat ageri da, dirudienez argitaratu gabea.