euskalkultura.eus

Victoria, Argentina. Nekazaritza Erakusketa urtero egiten da Victorian nekazaritza arloko elkarte, langile eta nekazariek berek euren produktuak erakutsi ahal izateko. Irabazi-asmorik gabeko elkarteek ere bere lekua izan dute erakustaldian, eta aurten bigarren aldiz Haritz Euskal Etxeak Euskal Herriari buruzko stand bat altxatzeko gonbidapena jaso du. 'Nekazaritza Elkartearen presidente den Oscar Larracoechea ingeniariak luzatu zigun gonbitea eta iaz bezala, aurten ere parte hartzea erabaki genuen' azaldu dio Fabian Zorzabal euskal etxeko naguasiak EuskalKultura.com-i. '150 bat erakusketari bildu ziren asteburuan zehar baina gu izan ginen kolektibitate bakarra. Gainera, normalean hamar mila pertsonek bisitatzen dute erakusketa beraz, euskal kulturari informazioa eskaintzeko eta kide berriak egiteko ezin hobea zen okasioa'.

Liburuak, mapak, dokumentuak eta abizenei buruzko informazioa eskuratu ahal izan zuten euskal stand-era hurbildu ziren bisitariek. Horretaz gain, ikurriñak, txapelak eta beste oroigarri batzuk ere bazeuden salgai. 'Jendea jakin-min handiz hurreratu zitzaigun, batez ere abizenen jatorria jakiteko asmoarekin. Eta guretzat oso pozgarria da zeren eta stand-a antolatzeko lan dezente egin behar izan baikenuen'. Baina jendearen interesa ez zen Haritz euskal etxeak jaso zuen sari bakarra. 'Nekazaritza Erakusketak ere saritu digu. Erakundeko 4. saria, domina bat, jaso dugu egindako lanagatik', kontatu du Zorzabalek erabat hunkituta.

Lotura interesgarriak

Victoriako Nekazaritza Elkartea
www.sociedadruralvictoria.com