euskalkultura.eus

Vancouver, Kanada. Vancouverreko Zazpiak Bat Euskal Etxeak urtero Merritt herrira egiten duen txangoa arrakastatsua izan da aurten ere, elkarteko arduradunek adierazten digutenez, nahiz eta azken honetan eguraldia aurka izan duten. Elkarteko kideek Rancho Nicola ostatuan egin zuten lo eta asteburuan zehar arrantxuko instalazioak eta inguruak erabili zituzten hainbat jarduera burutzeko.

Basque Weekend edo Euskal Asteburua delakoa ostiralean hasi zen, "potluck" erako afari batekin (partehartzaile bakoitzak plater bat ekartzen du, besteekin partitzeko). Zazpiak Bat-eko lagunek azaldu dutenez, kanpoan egin zen afarian "trumoi eta tximista itzelak izan ziren, baina horrek ez zuen inor kikildu".

Larunbatean, indarrak berreskuratzeko, "Kanadatar Arrantxua" erako gosaria egin zen: opil txikiak artzi ziropearekin, arrautzak beiconarekin, txorizoa... Eta ondoren eguzkia atera egin zen, azkenean, hain zuzen ere txikien piñatarako.

[Txikiak urduri, piñatari jotzen hasteko irrikaz (argazkia VancouverEE)]

[Asteburuko beste jarduera bat, elkartearen mus txapelketa izan zen (argazkia VancouverEE)]

Gozo-eltzearen emozioaren ondoren, txikiek nagusiekin bat egin zuten aperifa egiteko: arkume erreki bikaina. Gaueko afaria, aldiz, etxe barruan egin behar izan zen. "Ordu horretan sekulako euria bota zuen eta ez ginen kanpoko karpetan afaltzera ausartu", azaldu dute. "Baina gero erauntsia pasa egin eta orduan bai, orduan San Juan Gaua ospatu genuen, su eta guzti. Sua, noski, txiki xamarra egin behar izan genuen, bertako arauak errespetatuz. Jaia eta musika goizaldeko ordu txikiak arte luzatu ziren".

[Rancho Nicola barnean afaldu behar izan zuten elkarteko bazkideek (argazkia VancouverEE)]

[Azkenean, erauntsiak amore eman zuen Vancouverreko euskaldunen aurrean eta San Juan sua piztu zuten elkarteko kideek (argazkia VancouverEE)]