euskalkultura.eus

Salto, Uruguai. Saltoko Euskaldunen Taldea euskal elkarteak urteari agur esan dio dagoeneko, euskal etxeko kideak eta lagunak bildu zituen afari batekin. Elkarteak 19. urteurrena bete du aurten eta sasoiko dabil, azkenaldian egin dituen ekimenen arabera. Gainera internet bidez bazkide eta lagunek ekimen horien berri jasotzen dute, elkartearen blogak --Vascos en Salto/Saltoko Euskaldunen Taldea-- informazioa maiz eguneratzen duelako. 

Blogean ikus daitezke, adibidez, iragan astean elkarteak egin zuen arte erakusketaren argazkiak. Euskal Etxearen arte lantegiak ikasturtea bukatu du eta Maria Angela Juanenaren ikasleek euren lanaren emaitza erakutsi zuten bertan. Ikasleak Rosaria Brancato, Luis Alberto Gonzales, Melania Passarini, Lorena Sepulveda, Jaqueline Igari, Annette Anllelini, Ana Maria eta Cristina Juanena, Diego Borges eta Bethania Silva izan dira.

[Arte erakusketan parte hartu zuten ikasleak (argazkia SET)]

Elkarteak azken asteetan egin duen beste ekimen bat, urtero legez, Saltoko Immigrantearen Egunean parte hartzea izan da. Azaroaren bukaera aldera ospatu zen jaia eta euskal etxeko dantzariek erakustaldi  batekin parte hartu zuten. Concordiako Euskal Etxeko lagun batzuk ere bildu ziren jaira, Saltoko euskaldunekin batera giroaz gozatzeko prest. Jai honen baitan egin zen omenaldian elkarteak agur esan zion aurten Salton euskera irakasle aritu den Aitziber Aranari. Irakaslea Victorian ariko da urtarriletik aurrera.

[Aitziber Arana, elkarteko euskara irakaslea, oparia jasotzen Saltoko Euskal Etxeak egin zion omenaldian (argazkia SET)]

[Euskal etxeko gazte batzuk kantari Euskal Gauan (argazkia SET)]

Aipatzekoa da ere elkarteak azaro erdialdera ospatu zuen Euskal Gaua. Aurten ere giro bikaina izan zen euskal elkartean eta gazte zein helduek gogotsu parte hartu zuten, kantuan eta dantzan.

-Saltoko Euskaldunen Taldearen bloga, hemen
-Saltoko Euskal Etxearen Facebook orria, hemen