euskalkultura.eus

Villa Maria, Argentina. Villa Mariako 56. Euskal Kultur Asteko egitaraua urriaren 17an hasi zen, ‘Truco’ eta Mus Txapelketa batekin, euskal etxearen egoitza barneko Euskal Herria aretoan. Ostiral 19an, berriz, eta leku berean, Asier Al­tu­nak eta Tel­mo Es­nalek zuzendutako ‘Aupa Etxebeste’ pelikula proiektatu zen.

Larunbateko egitaraua osoagoa izan zen eta iluntzeko 6:30etan hasi zen La Piedad  Kanposantuko Euskal Etxearen panteoian. Bertan, lore eskaintza egin zen hildakoen omenez. Jarraian, Gernika-Aita Jose Maria Iturbe Plazatxora abiatu ziren euskal etxeko kide eta lagunak eta Plazan beste lore sorta bat utzi zuten. Ondoren, meza eman zen La Santisima Trinidad parrokian, eta eguna bukatzeko, afari dotore bat eskaini zen euskal etxean. Afalostean, etxeko Jai Alai dantza taldeko dantzariek, txiki, gazte eta helduek, dantza ikuskizuna oparitu zioten bildutako jendeari.

[Lagunen arteko afaria partekatu zuten 2013ko Euskal Aste Nazionalaren antolatzaileek  (argazkiaEE)]

Aste Kulturalak astelehen 22an jarraitu zuen ekintza solidario batekin. Euskal etxeko talde batek bisita berezia luzatu zion Los Olmos auzoko Berta Gallardo jantokiari. Eta engaiamendu handiko proposamenekin segitzeko, asteartean pertsonen salerosketari buruzko hitzaldi bat eman zuen Alicia Peressutti idazleak. Aste Kulturalaren 56. edizioari amaiera emateko, Joseba Gotzon musikari bizkaitarra gonbidatu zuten Villa Mariakoek. Gotzonek kontzertua eskaini zuen urriaren 24an, euskal etxeko Euskal Herria aretoan.