euskalkultura.eus

Donostia-San Sebastián. Urtero legez, danborradaren burrunba Euskal Herrian ez ezik, Diasporan ere entzun ahal izango da, hamaika euskal etxek antolatzen dituzten ekitaldiei esker. Batzuk gainera, Donostia edo Azpeitiako jaietan ere tokia izango luketen danborrada ia profesionalak dira, hala nola Mexikoko Euskal Etxekoa eta Argentinako Necocheako eta, egun diferente batean egiten bada ere, Cañuelaseko euskal etxekoa. Elkarte hauek ez dute San Sebastian eguna besterik gabe ospatzen, aldiz, danborrek eta barrilek osaturiko egiazko danborradak aurkezten dituzte.

Madrilgo Euskal Etxeak txikien danborrada, nagusiena bezain abil eta saiatua, aterako du espainiar hiriburuko kaleetara, urtarrilaren 23an, igandean (umeak elkartu ahal izateko). Nagusiak, kalera atea ordez, elkarteak urtero San Sebastian eguneko bezperan egiten duen afarian jotzen dute. Aurten iaz bezala, afaria Madrilgo Guipuzcoa Jatetxean egingo dute. Eginak dituzte zenbait entsegu eta ilusioz beterik ari dira egun handia prestatzen.

Shanghaien lehendabizikoz

Shanghaiko Euskal Etxeak aurten estrenatuko du bere danborrada. Urtarrilaren 22an, larunbatean, izango da eta 30 bat lagunek osaturiko konpainia hiritzar txinatarraren kaleetan arituko da burrunbaka. Elkarteak gogo biziz ekin dio jaiari, eta konpainia soldadu eta sukaldariz jantzitako danborrariek osatuko dute. Ondoren elkarteko kideek afaria egingo dute Kuluska jatetxean.

Beste euskal etxe askok ere San Sebastian bezperan egiten dute bat jaiarekin, askotan afaria antolatuz eta telebistan Donostia edo Azpeitiko banderaren igoera ikusiz. Afari hauetan klasiko bat da 'San Sebastian kit'-a bezala ezaguna dena: bazkideei sukaldari txanoa eta makilak banatzen zaizkie, eta gaueko une gorenean telebistako doinuei jarraiki bakoitzak ahal duen moduan jotzen du San Sebastian martxa. Esan beharra dago urteen poderioz batek baino gehiagok ikasi dituela jada martxa gehienak.

Urtero legez, San Sebastian eguneko afaria antolatu dute aurten ere Parisen, baina elkarte frantziarra aurreratu egin da eta joan den asteburu honetan, urtarrilaren 15ean egin du elgarretaratzea Pariseko Eskual Etxearen egoitzan. Deitua da baita ere parrandarik Bartzelonan, Valladoliden, Murtzian, New Yorken, Caracasen, Seattle-n... Zerrenda luzeagoa da, zalantzarik gabe, horregatik datozen egunetan zuen laguntzarekin osatu nahi dugu. Non gehiago ospatuko dituzue San Sebastianak? Esaiguzue eta bidali mesedez argazkiak edota bideoak!