Itzulia Argentinan hasiko dugu eta musika giro alaiean, Buenos Aires hiriburutik idatzi baitigu bertako 'Coral Vasco Argentino Alkartasuna' abesbatzako kide den Olga Barandalla Sagastibeltzak, 'Eguberri On eta Urte Berri Zoriontsua' desiatuz. Chacabucotik, Buenos Aires baina probintzian, agiantza edo gurari onak bidali eta 'Ropa nirekin eta aurrera' diote hiri horretan Argentina osorako argitara ematen den 'Mundo Vasco' aldizkariko lagunek.
Chivilcoytik Nelba eta Jose Mariak gif animatu bat bidali digute familia handi bat mahai baten inguruan. Villa Mercedeseko Euskal Etxeak, San Luis probintzia argentinarrean, bertan jargiratutako Arantzazuko Ama Birjinaren irudiaren argazkia bidali dute, Jai Zoriontsuak eta 2007 Eguberri ona opatuz. Hiri beretik, irudi argentinar batek lagunduta, Julio Esnaola eta Liliana Rouan Narteburuk euren zorion agiantzak bidali dizkigute.
Musika eta guzti etorri den postala, 'Hator hator' kantu ezaguna baitakar, Eusko Jaurlaritzaren Argentinako Ordezkaritzatik Paula Barkin-ek bidali diguna. Ricardo Narcó irakurleak, bere aldetik 'eskerrik asko eta urte berri on' diosku Paranátik, Entre Ríos argentinar probintzian. Las Floresetik, berriz, Graciana Goicoechandia zuzendu zaigu, era elebidunean, 'Egitasmoak hezurmamitu, agiantzak bete eta ametsak gauzatu daitezen', Loretako Euskaldunak Euskal Etxearen izenean.
Tania Arriaga-Azkaratek, Orio ekoiztetxeak ETBrentzat egiten duen Mihiluze saiotik, kolorez, bizitasunez eta programari darion irudimen eta freskuraz, desio onez betetako power point-a bidali digu. Hurbiletik, Donostian lehenengo liburudenda zabaldu zuela hiru hamarkada bete direla ospatzen ari den Elkar euskal kultura taldeak '30 urte proposatzen, bilatzen, aurkitzen, jolasten, harritzen, hunkitzen, ikasten, ezagutzen, hazten eta kultura bizitzen, gozatzen' igaro izana partekatu nahi izan du 'kultura oparoa, zorion aroa' dioen postala helaraziz. Hendaiatik, Edurne Manterola irakurleak 'Urte Berri On deneri' idatzi digu.
Beste lagun batek, kasu honetan Zamudiotik Amagoia Gezuragak, 'Zorionak eta Urte Barri On' bidali dizkigu. Resistenciatik, El Chaco iparralde argentinarreko probintziatik, Fátima Soliz-ek 'Felices Fiestas a todos, eskerrik asko', idatzi du. Hiri beretik, Jose Christian Echevarriak entusiasmoz beteriko 'Zorionak eta Urte Berri On, lagunak!!!' igorri digu. Eta Pehuajótik, Arturo Ignacio Ezeberry Suquía-k 'Felices Fiestas para todos, que tengan un gran 2008'. Margolaria eta harpideduna bera, Santa Fetik Analía Sagardoyk Ernesto Sábatoren esaldi bat ekarri ondoren, 'a todos mis amigos, gracias por el encuentro de compartir la vida, Felices Fiestas y Feliz, muy Feliz 2008' gehitu dio.
Donostiatik, Rosa Garmendia Eraunzetamurgil-ek 'gabon zoriontsua eta 08 urte berri ona' dioen agiantza bota digu. Gauza beretsua egin du hiri beretik Ruth Jordek. Salt Lake Citytik, berriz, Estatu Batuetako Utah estatutik, Mary Gaztambidek idatzi digu, NABO edo Ipar Ameriketako euskal erakundeen federazioko presidenteak, bere ohiko sostengua emanez eta 'aste gutxi barru elkar ikusiko dugulakoan, Zorionak eta Urte Berri On' esanez. Montevideotik , Euskal Erria Euskal Etxeak, alegia: izen ofizialtzat Institución de Confraternidad Vasca Euskal Erria duen erakundeak Olentzero xano, xalo eta elurrez inguratu baten irudia bidali du 'Zorionak eta Urte Berri On' esaldiaz.
Gauza bera egin du, Bidasoaldetik Txapitelak, baina zenbait hizkuntzetan, tartean euskara, gaztelania, katalana, galegoa, okzitanoa, frantsesa... Tolosatik heldu zaigun notiziak berriz Iñaki Azaldegiren sinadura ekarri du eta osagai eguberritsuekin batera, beste profanoago batzuk emendatu dizkio. Tucumanetik, udako oporrak Urjauzietan hasi behar dituela esanez, Graxi Harlouchet-ek 'jaiak direla-eta agurtzen' gaitu, desiatuz 'energia gorena lagun izan dezazun bizibidean'.
Agiantza onak ere --'2008 zoriontsua opa dizugu'--Gipuzkoako Lasartetik Argia euskal aldizkariko lagunek igorritakoak, Sareko Argia hamar urte betetzen ari den egunotan. Avellanedatik, gurari onak Magdalena Mignaburu Berho-renak dira. Oiartzundik, Asmoz Fundazioko partaidea den Oihana Sanzberrok urte berri on baten nahikeria helarazten digu. Londres Inglaterratik Imanol Galfarsoro da idazten duena, 'bakarrik zorionak emateko Londresekoen partetik' bertako Euskal Etxeak Youtube-ra daraman link baten bidez best wishes for a healthy and bright 2008 igortzen dituela.
Perdizes, Sao Paulotik, Brasilen, Este Ormazabalena da agiantza, hain zuzen ere 'desejamos para todos/as vocês um Feliz Natal e um ano 2008 cheio de Paz e muita Felicidade! testuarekin, ohiko 'zorionak eta urte berri on!'arekin bukatzeko, General Villegasz/b> herri argentinarretik Nekane Olazar Bereauk egiten duen bezalaxe. Gauza bera La Pampatik, Santa Rosatik, Leandro Altolaguirre eta eta bere taldekoak, Alihuen izeneko elkartetik. Eta Marino G. Mendizabalek Buenos Airesetik. Argentina erdialdetik, ostera, Villa Mercedesetik, San Luis probintzian, Echevarria-Maria familia zuzentzen zaigu, Luis aita buru, Belengo estalpearen irudi batez eta itxaropena eta eguberri zoriontsua aipatzen duen testu baten ondotik 'Urte Berri On 2008, jaso ezazue agur bero bat' esanez euskaraz.
Mikelek, bere aldetik --Euskal Herriko parajeren batetik pentsatzen dugu-- , kuraia eta gure lanarekiko hitz goxoak bidali dizkigu. 'Egiten ari zareten lan galanta eta mesedegarriarengatik, segi horrelaxe', dio bere posta elektronikoak, 'zoriontzeko balio dezala mezu honek' erantsiz. Berba eskergarria. Iruñetik, Udalbideren izenean datorkigu bere christmas-a, Olentzeroren itzala lanean agertuz. Eta Estatu Batuetako Washington DC hiriburutik, Argia Beristain Daugherty aspaldiko lagunaren postal biziduna, Keegan bere bikotekidearekin dantzan. Zorionak birritan bi gazte hauei, euren lehenengo seme edo alabaren esperoan baitaude. Dirudienez, hori dela-eta, Las Vegas-era --Argiaren jaioterrira-- itzuliko dira, familia bertan hazteko.
Hondarribiatik, Juancar Ayerbe Goyak urtean zehar gu 'hor egon izana' eskertzen du, 'bihotzez jai zoriontsuak eta urte berri mundiaaaaala' (sic) opatuz. Buenos Airesetik, FEVAren izenean, Mariluz Artetxe erakundeko lehendakariak eta Felipe Eiheragibel idazkariak sinatzen dituzte desio onak, Horacio Marotto Etxezaharrena den diseinuarekin, kolore berdezurigorriak eta urdinzuriak tarteko. Sarmientotik, Santa Fen, Carlos Garanzini Mendiolak 'Euskal Herriari bakea eta elkar berradiskidetzea ekarriko dioten jai zoriontsuak' opa dizkie 'munduko euskaldun guztiei'.
Buenos Aires probintziako kostaldeko Necocheatik, bertako Euzko Etxeak 'jai hauetako bozkarioa bere lagun guztiekin partekatu nahi du, Eguberri On eta Urte Berri on guztioi' esanez. Gasteiztik, Enrike Knörr euskaltzaina, bere ohiko estiloari jarraiki, latinez zuzendu zaigu, Pacem et felicitatem in diebus nativitatis Iesu et in toto anno novo MMVIII hitzokin. 'Merry Christmas, Happy New Year, Zorionak, Felicidades' dio, berriz, New Yorketik Julian Abio euskal-newyorktarrak bidalitako postal indartsuak, zeinak, era xinple, artistiko eta zinez politean bera eta alaba erakusten duen.
Sergio Rekarte eta familia, Argentinako General Villegaseko Villegasko Euskaldunak Euskal Etxetik, Olentzeroren irudiaz baliatzen dira euren agiantzak bidaltzeko. Mexiko DFtik, ostera, bertako UNAM Unibertsitatean euskara eta euskal kultura lektorea den Gurutzne Etxeberria amezketarrak 2008 urte berri ona aipatzen du bere mezuan, eta 'eskerrik asko zure lanagatik'. Tandiletik, Alma Vasca astekariko arduradun den Jorge Gilabert-ek, Belengo hirukotearen marrazki baten ondoan 'Jai hauek ospatzeak bizi hobe baten hasiera' ekarriko digun esperantza azaltzen du dexente luzeagoa den bere eguberri mezuaren amaieran.
Chascomus herri buenosairestarretik, Zingirako Euskaldunak Euskal Etxeak Eguberri eta Urte Berri Festa Zoriontsuak opa dizkigu 'eskerrak emanez geure ekintzez egiten duzuen etengabeko hedapenagatik'. Olentzeroren istorioa ere atxikitzen dute, Maria Laura Eguren lehendakariak eta Pedro Mauregui Larranda idazkariak sinatzen duten lerroetan. Ordizia herri gipuzkoarretik, bertako seme izan zen Andres Urdanetaren bostgarren men deurrena ospatzen hasi diren honetan, Jose Migel Santamaria alkateak zorionak helarazten dizkigu bere eta herri ordiziarraren izenean.
Kolonbiako Medellindik , Antioquiako Euskal Ikasketa Zentruaren izenean, John Alejandro Riaurte eta Norberto Molinak 'Zorionak eta Urte Berri On' dioskute. Kolonbiatik baita ere, baina Bogotá hiriburutik, bertako Euskal Etxeak opa digu 'Eguberri eta urte berriak bakerako egiazko bidea topatzen lagun diezagutela une atsegin eta alai andana ekarriz!'. Sakanatik, Guaixe aldizkariak ere Zorionak eta Urte Berri On desioak bidali dizkigu.
Euskal Herritik atera gabe, Juanpe Azkunek osasuna, harmonia, konpainia ona eta jai egunotan ongi pasatzeko guraria agertu digu. Salvador Oriak Buenos Aires Hiri Autonomotik festak eta urte berri ona aipatzen ditu bere mezuan. Izaskun Kortazarrek, Boisetik, agiantza onez beteriko power pointa helarazi digu. Eta Luis Maria Martinez Garatek, Donostiatik, gauza bera desiatu digu, aldi berean errieta emanez Errioxako euskal etxeaz edo bertako euskal ekimenez argitara eman genuen artikulu baten kontura.
Donostiatik baita ere, Joxean Zubiarrek, Mark Twin-en aipu baten ondoan ilustrazioa daraman desio sorta elebiduna igorri digu. Eta Antton Aranburu EuskoSareko zuzendariak, Gasteizetik 2008rako agiantza onenak eta 'Gabon jaiak ere zoriontsuak izan dakizkizula', Eusko Ikaskuntzaren ekimen horren izenean. Debatik, Praileaitz-eko Xamanak ere 'Egunerri On'a opa digu, baita ere Bilbotik Xabier García Argüello kazetariak, 'Bakea eta osasuna 2008rako' esaldiaz.
Rosario, Argentinatik, Maria Teresa Vallet-ek esaten du, gaztelaniaz, 'EuskalKultura-ko lagunok, Zorionak, Eguberri ona opa dizuet eta guztion banan banan zein batera piztu dezagula une hauetan hain beharrezkoa den Esperantzaren argia'. Santa Fe probintzia beretik Fernando Lizarbek 'Eguberri eta Urte Berri On' idazten du, euskaraz eta gaztelaniaz ezezik, munduko laurogei bat hizkuntzatan, afrikaans-etik zulu-raino, tartean txerokia, mandarina eta guarania. Buenos Aires hiriburutik, bertako Caballito auzotik, Aitor Alava dantza irakasle arabarra ere agiantzaka ari zaigu. Macachínetik, ostera, mezua, 'besarkada pila bat denontzat', Miren Alazne Iruretagoyena-rena da, eguberri-zuhaitza eta bi aingerutxoren marrazkiak lagundurik.
Lizarratik Javier Hermoso de Mendozak idatzi digu. Bera Estella.com.es webguneko arduraduna da eta Feliz Navidad y Próspero Año Nuevo esaten digu, herri nafarreko Larruako San Pedroren klaustroko kapitel baten argazkia atxikita. Queretarotik, Mexikon, jatorri eibartarreko Jaione Arrieta Galarraga Vascosmexico zerrendako koordinatzaileak gauzak onak desio dizkigu 2008 urterako. Andeetako mendilerroraino jaitsiz, Cordilleraren magaletik, San Juan hiritik, Argentinan, Carina Gabriela Oyolak elebitara zuzentzen digu power point bidezko mezua, 'Feliz Navidad, Gabon Zoriontsuak, Un beso, Muxu bat' esanez. Bigarren bidalketa bat ere egiten digu, San Juango Eusko Etxea eta bertako Pio Baroja Liburutegiaren izenean.
Azken urteotan bertako hainbatek Iparraldeko Euskal Etxea deitzen dutenetik, alegia Buenos Airesen 1895etik ateak zabalik dauzkan Centro Vasco Francés delakotik, Norma Beatriz Rios-ek jai ederrak, maitasuna, zoriona eta alaitasuna aipatzen ditu bere hitzetan, ohiko 'Gabon eta Urte Berri On'arekin batera. Floridako Miamitik, Estatu Batuetan, Mercedes Mendivek bere newslettera igortzen du, best wishes, Merry Christmas and Happy New Year esanez. Eta Miamitik baita ere mintzo zaigu Miguel Angel Salazar, 'Zorionak eta Urte Berri On'ka. Arrecifesen bizi da, ostera, Juan Agotegaray eta honelakoxea da bere mezu elebiduna (sic): 'Pakean (en Paz) Zorion Gabona (Feliz Nochebuena) eta Urte Berri on (Buen Año Nuevo)! Biotzaren eta Biotzean (De Corazon y en el Corazon) Besarkada bat (Un Abrazo)'.
Seguruenik Lapridatik, Argentinako Eusko Alkartasunaren Alkartetxekoek euren agurra igortzen dute, aurrera daramaten lan eta engaiamendu politikoa berretsiz eta ohiko 'Eguberri eta urte berri on'a desiatuz. Buenos Airesetik, Cristina Cordarak, bere izenean, agiantzak hainbat hizkuntzatan banatzen dituen postala bidaltzen du eta hiriburu horretako Iparraldeko Euskal Etxeko kide den Carlos Arturo Fernández 'Olentzero' jaunak erakunde horretako 'Kultura Azpibatzordeari urtean zehar' eskaintzen diogun 'sostengu guztia' eskertzen digu.
Errenteriatik, argentinar eta euskaldun, Julitxu Gysling Zubillagak testu polit bat helarazi digu, berau osoa eguberri besarkada hunkigarritzat har daitekeen oparia. Mar del Platatik, Alderdi Jeltzalearen Argentina Buru Batzarrak 'Eguberri eta urte berri zoriontsua, Feliz Navidad y Feliz Año Nuevo' opa digu. Halaxe egiten dute, baita ere, Misiones Argentina iparraldeko Euskal Jatorri Euskal Etxeko lagunek. Eta, Getxotik, Euskal Herri europarrean, Zuzenbide espezializazio masterra egiten ari baita bertan, Veronica Domingo abokatu euskaltzale eta euskaldun mardelplatatarra.
Montevideotik, Renée Fernández eta Danilo Maytía bikoteak euskaluruguaiar kulturaren aldeko bere 'zorionak eta urte berri on'a pasatu digu. Uruguaitik atera gabe, Florida herritik, nafarren alaba den Veronica Azpiroz-ek agiantza beroa zuzentzen die 'euren ahaleginarekin gure lur miragarritik hurbilago egoten lagundu diguzuenoi, eskerrik asko hara hurbilagotzeagatik eta oso Eguberri zoriontsua eta agiantzak beteko dituen 2008 urtea' da bere nahikeria. Power point bat dakar nahikeria horiekin eguberri izeia osatzen doana. Donostiatik, bertako alkate Odon Elorzak Zorionak opa dizkigu, gauza bera egiten duelarik Arteatik, Sabino Arana Fundazioaren izenean, Juan Mari Atutxak.
Eta gisa bera Sydneytik, Australian, Carlos Orue Olentzeroak, postal koloretsu eta euskalaustraliar batez, bi herrialdeotako osagaiak batzen baitira bertara, hala nola Sydneytik urrun ez dauden 'The three sisters' hiru mendi tontortxoen irudi famatua eta euskal eta australiar banderak, 'Zorionak eta Urte Berri On' testuarekin, 'Sydneyko Gure Txoko, Australia' esaldiarekin lagundua. Ghanatik, Afrikan, agurrak Martino Corazzin fraidearenak dira, haur afrikar andana agertzen den argazki batekin.
Lagun bati bidali
Komentarioa gehitu
