euskalkultura.eus

Boise, Estatu Batuak. 2012-2013 ikasturtean, 611 ikasle hurbildu dira "Basque Studies Minor"ak eskaintzen dituen eskoletara Boise State Unibersity-n (BSU). Kopurua esanguratsua izateaz gain, antolatutakoaren kalitatea eta eskainitako eskola eta ikastaroen maila ere gogoan hartzeko modukoa da. Nere Lete irakasleak, 'Basque Studies Minor'eko zuzendari denak, azaltzen duenez, ematen dituzten "eskolak 14 departamendurekin gurutzatu ditugu euskal sarea unibertsitate osora zabalduz". 

Izan ere, eskolak eman diren arlo eta gaietako bakoitza unibertsitateko arlo horretako aditu eta departamenduekin lankide eskaintzen saiatu dira. Hala nola, euskal ekonomiaz eskaintza egin dutenean, Ekonomia Departamenduarekin lankide antolatu nahi izan dute; euskal historia tratatu dutenean, Historiakoarekin edo euskara izan denean ikasgai, Hizkuntza departamendua lotu dute ikastarora.

Orotara, hamalau izan dira lankide izan dituzten departamenduak, honakoak: Basque, Basque Studies, Anthropology, History, Sociology, Economics, International Business, Gender Studies, Kinesiology, Theater, English, Foreign Language, Spanish eta Political Science (Euskara, Euskal Ikasketak, Antropologia, Historia, Soziologia, Ekonomia, Nazioarteko Tratuak, Genero Ikasketak, Kinesiologia, Antzerkia, Ingelesa, Atzerriko Hizkuntzak, Espainiera eta Zientzia Politikoak). Nere Letek emendatzen duenez, departamendu gehiago biltzekotan dira eta "etorkizunean gure ikastaroak aipatutako departamenduez gain, Geography, Honors College eta Environmental Studies-ekin ere gurutzatzeko asmoa dugu", diosku.

"Ikus daitekeen bezala 'Basque Studies Minor'ak BSUn osasuntsu eta indartsu dirau", baieztatu du duela hogei urtetik gora Boisen bizi den filologo eta irakasle errenteriarrak.

-http://sspa.boisestate.edu/basquestudies