euskalkultura.eus

New York, AEB. Txikifest jaiaren hirugarrena iragan ekainaren 2an egin zen, New Yorkeko Chelsea auzoan eta ia 600 lagun bildu ziren bertara euskal ardo txuri honetaz gozatzeko prest. 

"Txakolina ezaguna egin da azken urteetan New Yorken eta AEBetako beste zenbait hirietan. Txikifest jai honek eta antzeko beste batzuek gure ardo ona denon ahotan mantentzen laguntzen dute", azaldu dio EuskalKultura.com-i Eder Montero sukaldari bilbotarrak.

[Unai Aizpuruk, BilbaoHistoriko elkarteko presidenteak, eta Eder Montero sukaldariak saria eman zioten Debora Bergshon. Txikifest-en egin zen zozketan Bilborako bi laguntzako "Bilbao Bizkaia Be Basque" bidaia irabazi zuen. Bizkaiko Turismo sailak eta Bilboko Udalak eman zuten saria (argazkia Txikifest.com)]

Jaian Euskal Herriko hiru jatorri deituretako txakolindegiek emandako ia 700 botila edan ziren. Monterok adierazi duenez, bertan bildu zen dirua --10.000 dolar inguru-- "Sanctuary for Families" GKEari emango diote antolatzaileek. Genero indarkeria jasaten duten sendiak laguntzen ditu erakunde honek.

"GKE hau eta aurreko biak ere --FACES (epilepsia gaitzaren aurka) eta NYU Ospitaleko Haur Goiztiarren Saila--, arrazoi oso pertsonalengatik aukeratu ditugu; gure bizitzan eta gure lanean izan diren gertaerengatik", agertu du Monterok.

[Txakolina zerbitzatzen Txikifest-eko stand batean (argazkia Txikifest.com)]

Txakolin Egunak oihartzun zabala izan zuen hiriko komunikabideetan eta antolatzaileak pozik agertu dira, haien esanetan, festak dagoeneko bere lekua egin duelako Sagar Handiaren bihotzean.

-Argazki gehiago: www.txikifest.com