euskalkultura.eus

Pellegrini, Argentina. Pellegrini-ko Udaleko Kultura Sailak gonbidaturik, joan den martxoaren 5ean Trenque Lauquengo euskaldunek stand bat muntatu zuten Pellegriniko Gizataldeen Jaian. Beste zenbait kolektibitaterekin batera --Frantzia, Espainia, Italia, Bulgaria, Bielorrusia eta Irlandakoak, besteak beste-- 'Euskal Sustraiak' Euskal Etxeko euskaldunek Euskal Herriko kulturari buruzko informazioa eskuratu zieten bisitariei.

"Hainbat kontsulta liburu bildu genituen standera, jendearen eskeak hobeto erantzun ahal izateko. Horrekin batera euskal abizenen jatorriari buruzko datuak eskuratu genizkien horri buruz galdetu zuten lagunei”, azaltzen diote euskal etxeko kideek EuskalKultura.com-i. “Euskal Herriko geografia eta herrien kokapena ere bertatik bertara ikusi ahal izan zuten bisitariek, horretarako propio eraman genituen mapak medio. Denon artean konpartitu genuen giro oneko afariarekin bukatu genuen eguna, izan ere oso egun polita izan baitzen guztiontzat”, adierazi digute.

[Kolektibitate irlandarra janariaz arduratu zen. Euskaldunen standean Euskal Herriko informazioa eskura zitekeen]

Dantza eta musika ikuskizunak ere aurkeztu zituzten kolektibitateetako ordezkariek, euren jaioterrietakoak eta baita Argentinako bertakoak ere.  Jai honekin, eta inguruko herrietako biztanleak lagun, udako ekitaldiak itxi zituzten Pellegriniko herritarrek.