euskalkultura.eus

Tandil, Argentina. Mugimendu handiko erakundea da Tandilgo Gure Etxea. Izan ere, adin guztietarako eta mota askotako ekintzak gauzatzen dira urtean zehar jarduera luzea duen euskal etxe honetan. Bere liburutegia egunero dago irekita arratsaldeko 5etatik 8etara etxeko kideek eta kide ez direnek kontsultak egin ahal izan ditzaten.

Cecilia Cenoz, Beatriz Poume eta Valeria Aramburu irakasleek euskara klaseak ematen dizkiete hainbat ume, gazte eta helduei. Martin Tumbarino zuzendari, etxeko abesbatzak astelehenetan eta ostegunetan entseatzen du, iluntzeko 8etatik 9:30etara.

Dantzak eta kirola

Euskal dantzak gustuko dituztenentzat ere badago aukera Gure Etxean. Berehalako hasiko diren saioetan, txikiak larunbatetan elkartuko dira dantzen munduan murgiltzen hasteko eta helduek asteartetan iluntzeko 8:30etatik 10etara eta larunbatetan iluntzeko 8 etatik 10etara izango dute saioak egiteko hitzordua.

Kirolari dagokionez, euskal pilota eskolak emango dira etxeko egoitzan. 8 eta 15 urte arteko neska-mutilek asteartetan eta ostegunetan izango dituzte klaseak, arratsaldeko 5:30etatik 7etara. Helduentzako praktikak ere, emakumeentzat zein gizonentzat, laster hasiko dira. Informazio gehiago eskuratzeko, Sarmiento kaleko 1079 zenbakian dagoen euskal etxeko idazkaritzara jo behar da, egunero arratsaldeko 5etatik 8:30etara.

Datorren larunbateko Biltzar Orokorra

Beste alde batetik, erakundeko Zuzendaritza Batzordeak Biltzar Orokorrerako deia luzatu du. Biltzarra datorren larunbatean, apirilaren 2an, burutuko da elkarteko egoitzan eta eztabaidatuko diren gaien artean, Zuzendaritza Batzordeko zenbait kargu berritzea eta zozketak egiteko udaletxeko baimena nola lortu, aipa daitezke.

Tandil Eskualdeko Dantzarien Topaketa

Jaiak ere ospatuko dira aurten Gure Etxea Euskal Etxean. Eta lehena Eskualdeko Dantzarien Topaketa izango da, maiatzaren 14an. Tandil-etik hurbil dauden herrietako euskal etxeei dago zuzenduta gonbitea, eta egitarauari dagokionez, asteburu horretako larunbat arratsaldean Aitor Alava dantzariak klase bat emango du eta egun berean, baina gauean, dantzari guztiek 'taska' batean parte hartu ahal izango dute.