Tandil, Argentina. Tandilgo Gure Etxea Euskal Etxeak bisita berezia jaso zuen joan den hilaren 29an. UNICENgo (Universidad Nacional del Centro de la Provincia de Buenos Aires) Adinekoen Programako ikasleak bertaratu zitzaizkion, euskaldunen biloba eta Euskal Etxeko muslari den Angeles Pagola euren historia irakaslearekin batera. Gure Etxeko lehendakari den Cecilia Lejarreta eta Beatriz Poumé euskara irakaslea anfitrioi, egoitzaren bisita gidatua jaso eta erakundearen historia ezagutu ahal izan zuten.
“Oso topaketa polita izan zen. Kultura, euskal pilota, ohiturak eta nortasuna hartu genituen hizpide. Eta amaitzean kalea gurutzatu eta Gernikako Arbolaraino joan ginen, eta hor haritzak euskaldunontzat duen esanahia azaldu genien”, azaldu dio Euskalkultura.eus-i Cecilia Lejarretak, izan ere Euskal Etxearen egoitza aurreko Martin Rodriguez Parkean dagoen haritzari erreferentzia eginez.
Hiru kimu berri El Gallon
Joan den hilaren amaieran ere, herritar talde batek eskatuta, eta Tandil hiriaren bigarren mendeurrenaren ospakizunak direla eta, Gernikako Arbolaren hiru kimu landatu ziren El Gallo auzoan. M. Rodríguez Plazako haritz beraren ezkurrak oinarri hartuta landatutako kimuak dira, Gernikako Batzar Etxean dagoenaren ondorengoak. Gure Etxeak kudeatzen duen “Legatua eta Ondarea - Zuhaitz Ondoan” izeneko basotze eta parketze proiektukoaren baitan eman dira dohaintzan.
Kimuak hazten ari dira dagoeneko errepide nazional 74 eta Don Bosco etorbidearen bidegurutzean dagoen parkean. Tandilgo Berdegune Publikoen Zuzendari Walter Urso gainbegirale landatu ziren. Euskal Etxearen izenean, proiektuaren arduradunetako bat den Santiago Benavidesek, kimu hauen historia, garrantzia eta izaera kulturala azpimarratu zituen, baita ekitaldiaren izaera ekologikoa ere. Tandilgo alkate edo intendente Miguel Lunghi ere ekitaldiko partaide izan zen, hiriko zenbait erreferente politikrekin batera.
Lagun bati bidali
Komentarioa gehitu
