euskalkultura.eus

Sao Paulo, Brasil. 1959ko abenduaren 9az geroztik Eusko Alkartasuna Euskal Etxea dena eta elkarteak egoitza duen Gernika Kutun etxe eta jabegoa Sao Paulotik 25 bat kilometrotara sortu eta biziarazi dutenetakoa izan da Francisco Alava; are gehiago, euskal-saopaulotarrek bertan egin dituzten hamaika ekitalditako sukaldaria ere izan da Eusko Alkartasunaren urte-amaiera festan omenaldia jaso zuen laguna, elkartearen bazkide sortzaileetarik geratzen den azken mohikanoetakoa.

 [Gernika Kutun-en, berdez inguratuta, eta Gernikako Arbolaren kimuak ere bertan hazten dituen eremu berezi honetan egin zen, hamarnaka lagun eta bazkide bildurik Francisco Alava bazkide sortzaile, chef eta lagunari esker ona eta atxikimendua agertuz (argazkiaMA)]

Hamarnaka bazkide eta euskal etxekoen eta euskaldunen adiskide batu ziren abenduaren 1ean, igandea, bi egun beranduago etorriko ziren San Frantzisko Xabier eta Euskararen Eguna ere ekitaldi berean gogoz ospatzeko eta omenaldia jaso behar zuen Francisco Alava bera izan zen, beste behin, bazkaria prestatzeko ardura hartu zuena. Ikusiko aurrerantzean ere hala den, "erretiratzen ari dela" iragarri baitu igandean ere sekulako paella tentagarria prestatu zuen Alavak.

 [Bertan egindako beste hamaika alditan bezala, elkarretaratzeak Francisco Alava bera izan zuen sukaldari, hitzek baino itxurak berak aurkezten duen paella ikaragarriaren prestatzaile (argazkiaMA)]

Sao Pauloko Eusko Alkartasunako historikoetako beste batek, elkarteko ohorezko bazkide eta lagun sortzaile Elias Echegoyen Tabar-ek hartu zuen hitza Francisco Alavak euskal elkarteari egindako ekarpenak eta bizitza osoko dedikazio ibilbidea azpimarratzeko, Euskal Etxearen eta bertaratutakoen atxikimendu eta esker ona adieraziz.

 [Elías Echegoyen izan zen elkartearen eta bildutakoen izenean Francisco Alavaren figura eta merezimenduak laburbiltzeko ardura jaso zuena. Irudian, eskuinean lehenengo lerroan, Elias Echegoyen bertaratutakoei mintzatzen zaie, ondoan Francisco Alava bera duela (argazkiaMA)]

 [Txoko Alava izena darama aurrerantzean Sao Pauloko Euskal Alkartasunaren Gernika Kutun egoitzako sukaldeak, zorionak Francisco Alava eta Alava familiari (argazkiaMA)]

Ekitaldiak balio izan zuen baita ere, omenaldiko parte, Gernika Kutun-eko sukaldeari Txoko Alava izena paratzeko. Horren agergarri, egur tailatuzko karteltxo bat geratzen da sarreran. Bazkaria, Francisco Alavak ederki egiten dakien paella gogoangarri bat eta zenbait postre, bildutakoek molde tradizionalean kantatutako zenbait kantuek edertuta bukatu zen, ongi merezitako txaloak emanez omenduari. Elkarretaratzea eguerdi ondoko ordu batetik arratsaldeko bostak arte luzatu zen, tenore egokia igande batean etxera bueltatzeko Sao Paulo hiritzar eta estatuko leku diferentetan bizi diren jendeentzat.