euskalkultura.eus

Laida Zabala/Txileko Santiago. Txileko bandera eta Ikurrina elkar lotzen zituen pin-a aldean eta euskal kanten liburuxka eskuan, hasten zuen gonbidatu bakoitzak Santiagoko Euzko Etxeko mendeurrenaren ospakizuna. Oraingoan, esku pilota partida bat beharrean, bestelako ikuskizuna eskaintzen zuen bertako frontoiak, euskal nortasunaren adierazle zen agertoki ezin egokiagoan. Eserlekuz beteriko mahai luzeak gonbidatuen esperoan zeuden, edalontziak Euskal Herriko txakolin, zein Txileko ardo onenarekin betetzeko gogoz, eta plateretako labana nahiz sardexkak Bizkaiko chef onenetarikoen gutiziak dastatzeko irrikatan.

Ekitaldian, Bizkaiko Foru Aldundiko ordezkariak, Txileko enpresariak eta euskal komunitateko eta Euzko Etxeko partaideak egon ziren, tartean Ekonomia Sustatzeko foru diputatu Imanol Pradales, euskal jatorriko enpresari txiletarren elkarteko fundatzaile den Alejandro Sande, Euzko Etxeko egungo eta aurreko zuzendaritzetako kideak nahiz Bilbon Txileko kontsula den Iratxe de Madariaga, teknologia berriak baliatuz Jose Luis Bilbao Bizkaiko diputatu nagusiak zuzeneko konexioa egin zuelarik, Jaurlaritzaren izenean Txile eta Perurako Euskadiko ordezkari Ana Urchueguia bertaratu zen bitartean.

Dantzariak, korala eta, telekonferentziaz, Jose Luis Bilbao

Egin zituen aurkezpen-hitzetan, Euzko Etxeko artxibari eta 'betidaniko' kide den Pedro Oyangurenek  erakundearen historiaren laburpen txiki bat egin zuen eta historia hori eraikitzen lagundu zutenak oroitu zituen. “Bere herria atzean uzten duen euskaldunak bi bizitza dauzka; bata, bere itzulerarekin amesten; bestea, euskal nortasunak bizi iraun dezan borrokan”. Bildutako guztiek biziki eskertu zuten Oyangurenek euskaraz hitz batzuk eskaintzeko eginiko saiakera. Euzko Etxearen omenez topa egiteko gonbidapena luzatuz amaitu zuen hitzaldia. Ondoren, bertaratutako guztien miresmenerako, hitzak abesti bilakatu ziren 15 gizonek osaturiko Euzko Etxeko Abesbatzaren eskutik, Patricio Aburto zuzendariaren batutari jarraiki eta Cristian Bustosen musikaren laguntzaz.

Jose Luis Bilbao Bizkaiko diputatu nagusiak, zuzeneko konexio bidez bertaratuta, mendeurrena zoriondu eta eskerrak eman zizkien euskal-txiletarrei. “Eskerrik asko zuen bi nazionalitateak, Euskadiren memoria eta zuen sustraiak mantentzeagatik”, esan zuen. Dantza bidezko hizlari, Euzko Etxeko “Itxaropen gaztea” dantza taldeak ekitaldia kolorez eta mugimenduz jantzi zuen. Maritxu eta Maite Bastarrica ahizpek gidatzen dute dantza taldea, eta eurak izan ziren dantzaldiari “Agurra”-rekin hasiera eman ziotenak, gerora denek batera “Makil dantza” dantzatu zutelarik. Maite Bastarricak, aita zein aitona Euzko Etxeko zuzendari izanik, “euskal kultura dantzaren bitartez” mantentzen duela ziurtatu zuen, Euskal Herriari zion maitasuna belaunaldiz belaunaldi helarazi dioten sentimendu bat zela baieztatuz.

Bizkaiko jaki eta ardoak Mendeurrena ospatzeko

Imanol Pradalesek Txilen gauzatutako harreman politiko-ekonomikoen inguruan egin zuen aipamena. “Gure kultura sustatzeko etorri gara hona, baina baita arlo enpresariala ere, hori baita munduan geure lekua egiteko bidea”. Arlo ekonomikoa aipatuta, “zoriontsu nago” leloa hartu zuen bere hitzaldiko ardatz “Txilen jasotako harrera ezin hobeagatik, Manchesterren aurrean Athletic-ek izandako garaipenagatik, eta Euzko Etxearen mendeurrenagatik”. Zazpi euskal herrialdeei erreferentzia egin ostean “Gora Euskadi Askatuta!” oihuarekin amaitu zuen.

Gauak aurrera egin ahala, hitzaldiek, abestiek eta dantzek bidea ireki zioten gastronomiari, gonbidatu guztiak itxaroten ari ziren momentua heldu zelarik: Pintxoak, txakolina eta ardoa bilakatu ziren ekitaldiko protagonista, beren egileekin batera, hala nola Beñat Ormaetxea, David Garcia, Javyer Gartzia zein Ricardo Perez chef-ak eta Jon Andoni Rementeria sommelier-a, hurrenez hurren. Trikitixa eta panderoaren doinupean, aulkiak eta sabela berotu ostean, hankak berotzeko momentua heldu zen euskal kanten laguntzarekin batera, kalejirek frontoia atzetik aurrera gurutzatu zutelarik. Mendeurrena mendeurren, Euskal Herri txiki bat aurkitu ahal izan zuen ekitaldira bertaratu zen orok, Txileko Santiagoko Euzko Etxean. Imanol Pradalesek esan legez, “Euzko Etxeak ehun urte gehiago beteko ditu”. Hala izan bedi.