euskalkultura.eus

Santa Fe, Argentina. Euskaldunak bai, baina argentinarrak ere badira Ameriketako hegoalderaino heldu ziren Euskal Herriko immigrante haien ondorengoak. Horregatik ez da batere harritzekoa euren bi alderdiak lantzea eta hain gogo handiz hartzea parte, esaterako, argentinar jaietan, askotan euskal arropak jantziz eta ikurriña eramanez. Maiatzaren 25ean nahiz uztailaren 9an Santa Feko euskaldunek Pirinio Mendebaldeko herriaren ordezkaria izateko ardura izan zuten udalak antolatutako ekimenetan eta ondo asko bete zuten eginkizun hori, Gure Etxea euskal etxea bitartekari.

[Santa Feko festarik jendetsuena da bertako Gizataldeen Jaia]

Euskal Herriaren ordezkari agertzeko beste aukera bat egokitu zitzaien joan den hilean. Ekainaren 18, 19 eta 20an Hiriko XVIII. Gizataldeen Jaia ospatu zen eta Santa Feko euskal etxearen kideek bi stand – bata kulturala, gastronomikoa bestea-- muntatu zituzten Belgrano Geltokian burutu zen festan. Santa Feko Gure Etxea-k gonbidaturik, Paranako Urrundik elkarteko dantzariek euskal dantza ikuskizuna eskaini zioten bildutako jendeari.

[Paranako Urrundik euskal etxeko dantzariak Santa Feko Gizatalde Jaian]

[Euskaldunek muntatutako stand gastronomikoa eta kulturalaren bi ikuspegi]

“Gero eta garrantzi handiagoa ari da hartzen jai hau. Ekitaldiaren helburua historian zehar bertan kokatu ziren etorkinei omenaldia egitea da, eta herri bakoitzaren musika, dantzak, plater tipikoak eta oro har, ohiturak erakusten betetzen da asmo hori”, azaldu diote Gure Etxea euskal etxekoek EuskalKultura.com-i. Euskal kolektibitatearekin batera, Argentina, Alemania, Bolivia, Kroazia, Espainia, Israel, Italia, Japonia, Polonia eta Suitzako gizataldeek ere prestatu zituzten standak eta ikuskizunak.

[Argazkilaritzaren Argentinako Akademiak Gizatalde Jairako egindako erakusketa: euskal gizataldeko haurrak]

Aipatzekoa da Asiako herrialdeak pairatutako lurrikara eta tsunami-a gogoratuz, jaiaren aurtengo edizioak “Guztiok Japoniaren alde” leloa izan zuela. Hiru eguneko jaialdia bukatuta, antolatzaileak Elkarte Suitzarrean  bildu ziren jaiaren arrakasta ospatzeko.