euskalkultura.eus

San Juan, Argentina. Joan den otsailaren 3an aurkeztu zitzaizkien Eguzkiaren Festako antolatzaileei Eguzkiaren Karruselean parte hartuko duten karrozen maketak. “Guk proposatutakoak Sanferminetako giroa islatzen du”, azaldu dio Ofelia Larrea Eusko Etxea-ko lehendakari ohiak EuskalKultura.com-i. “Oholtza mugikor baten gainean eskuz egindako zezenak jarriko dira eta euskal etxeko gazteak San Ferminetako koloreekin jantziko dira. Ardo kupel batzuk ere ezarriko dira oholtzan eta puxika batzuekin mahats sortak irudikatuko dira. Dena Argentinako banderez eta ikurrinez apainduta, jakina”.

Eusko Etxea euskal etxeak aurkeztutako maketa antolatzaileen onarmena jaso zuen eta besteekin batera ikusgai egon zen hiriko udaleko Centro Civico-n. “Orain benetekoa egiteari ekin behar diote neska eta mutilek. Gure karrozaren izenburua 'San Juango txupinazoa' da, eta ardoa zahatoan eskainiko zaio publikoaren jendeari. Horretaz gain, agintarien palkoaren aurrean euskal dantzak egingo dituzte euskal etxeko dantzariek”, jakinarazi digu Ofelia Larreak.

Karrusela otsailaren 24an izango da eta hiriko 25 de Mayo plazaren inguruko kaleetan kokatuko da ikusleek probintziako departamendu eta gizatalde bakoitzak aurkeztutako gaiak ondo ikus ditzaten. Aurtengo edizioan, eta leloarekin bat eginez, Argentinako ardoaren historia eta orainaldia, eta upeltegien lana eta ardoaren inguruan egiten diren jaiak islatuko dira karrozetan.

Antolatzaileen diotenen arabera, 150.000 bat ikusle bertaratuko dira San Juango 25 de Mayo plazara Eguzkiaren Karrusela ikustera eta beste hainbat bilduko dira hurrengo egunean, hau da, otsailaren 25ean hiriko Autodromoan folklore ikuskizunak ikustera.