euskalkultura.eus

San Frantzisko, AEB. BEO elkartearen 2013ko Basque Cultural Day egunak euskaldun asko bildu zituen BCCra jaialdi honen kultur egitarauaz gozatzera. "Gaelic zati bat" izenburupean, egunak euskal, irlandar eta eskoziar kulturen arteko harremanak aztertu zituen, hitzaldi eta dantza erakustaldiak baliatuz horretarako. 

Hitzaldi sailak abiatu zuen eguna, BEOko Marisa Espinalen aurkeztuta. Aurreneko hizlaria Marcia Barinaga izan zen eta entzuleek adi-adi jarraitu zuten bere proiektuari buruzko solasaldia: Barinagak euskal gazta egiten du Kalifornian; gaztagintzari buruz ezer jakin gabe hasi zuen egitasmoa, eta egun oso arrakastatsua da bere Baserri Cheese delakoa. Hitzaldia laguntzeko, Barinagak gazta banatu zuen entzuleen artean, dastatzeko. 

[Marcia Barinaga gaztagileak Barinaga Ranch-en egiten duen gaztari buruz hitz egin zuen (argazkia SFBCC)]

Ondoren, Lisa Corcostegui dantzari eta historialariak euskal, eskoziar eta irlandar dantzen arteko  harremana izan zuen hizpide eta ikusleak biziki harritu zituen antzeko dantza pausoak erakusten zituzten bideak erakutsiz. Amaitzeko, Xabier Irujok, Center for Basque Studies-eko zuzendariak, autodeterminazio eskubideari buruzko hitzaldia eman zuen; besteak beste, Irujok Eskozian 2014an egingo den erreferenduma azpimarratu zuen.

[Xabier Irujo, Center for Basque Studies-eko zuzendaria, hitzaldiko une batean (argazkia SFBCC)]

Ondoren, eguneko jarduerak frontoira pasa ziren eta han dantza erakustaldia eskaini zuten Zazpiak Bat taldeak, Scottish Highland Dancers taldeak eta Irish Step Dancers delakoak. Ekitaldia abiatu aurretik, Jeff Campbell gaitajoleak "Mendian Gora" euskal kantua jo zuen eta Johnny Curutchet bertsolariak bertsoa bota zuen.

[Valeria Etcharren, Johnny Curuchet eta Jeff Campbell gaitajolea, "Mendian Gora" jotzen (argazkia SFBCC)]

Ondoren, hiru taldeen dantza erakustaldiak txalo zaparrada bildu zuen. Eguna amaitzeko, anaitasun afaria egin zuten 2013ko Basque Cultural Day honetan parte hartu zuten lagunek.