euskalkultura.eus

Rosario, Argentina. Zortzi urte daramatza airean Zazpirak Bat Euskal Etxeak ekoizten duen 'Euskaldunaren hitza' irratsaioak. Zortzi urte Euskal Herriko eta Rosarioko euskaldunen berriak zabaltzen. Orain arte, irratsaioa asteazkenero –eguerdiko ordu batetik ordu bietara– eskaintzen zuen Santa Fe probintziako hiri honetatik bertako LRA5 Radio Nacional Rosario emisorak AM 1300 y FM 104,5 frekuentzietan. Aurten, berriz, euskal emankizuna ez da irrati honetatik egingo.

“Aurten Radio nacional-ek ez du gure betiko ordutegia errespetatu; hori dela eta irrati horretan ez geratzea erabaki dugu”, adierazten du saioaren aurkezlea den Luis Maria Barrandeguyk. “Hala ere, aurrera segitzen dugu gure asteko elkarretaratzearekin eta saioa zuzenean entzun daiteke internet bidez euskal etxeko web orrian –www.zazpirakbat.com– edo geure orrian –www.palabradevasco.com.ar–. Bitartean, beste emisora baten bila gabiltza”, azaldu du Barrandeguyk. 

Elkarrizketak, berriak, musika eta lagunen arteko mintzaldiak partekatzea da saioaren helburua eta hala jarraituko du nahiz eta, momentuz, sarean soilik. Hala ere, egoera konpondu bezain laster, irratiko dialean aurkituko dute berriz ere euskaldun rosariotarrek beren programa hau, asteazkenero, eguerdian, hala adosten badute.