euskalkultura.eus

Rio Cuarto, Argentina. Urriaren 11ean, igandez, egin da Rio Cuarton, bertako 'Gure Ametza' (sic) euskal etxearen 15 urteak ospatzeko festa. Giro alai eta aldi berean hunkigarri batean, berrehun lagunetik gora, tartean bazkideak, euren familiak eta elkartearen adiskideak, ekin zioten EEren egoitzako areto nagusian ipinitako mahaietatik ikuskizuna txalotu eta afariaz gozatzeari. Villa Mariako euskal dantzariak, 'Jai Alai' izenekoak, eta baita 'Helduak' helduen taldekoak ere gaualdia edertu eta biziagotu zuten.

[Villa Mariatik etorri ziren dantzariak, Rio Cuartoko anai-arreben festa handia edertzeko]

Besteak beste bertaratu ziren Villa Mariako Eusko Etxeko lehendakari Raúl Alberto Onnainty; Alejo Martín, Cordobako 'Gure Txokoa' Euskal Etxeko lehendakaria; eta Villa Mercedesko (San Luis probintzian) 'Euskal Etxea'ko ordezkariak.

[Euskal Etxeko webgunea, Iñaki Bilbaok diseinatu eta osatua; 'Gure Ametza', munduan interneten lehio propioa daukaten euskal etxeen taldean kokatzen du]

Ospakizunetako ardatzean elkartearen webgunearen aurkezpena gailendu zen. Iñaki Bilbaok diseinatu eta gauzatua, bertan zeudenen txaloak bildu eta onespen hitz andana bereganatu zuen. Euskal Etxearen bizitza instituzionala agertzeaz gain, www.centrovascoriocuarto.com, webgune hezitzaile eta elkar-eragile gisa plazaratzen da eta euskal kultura, historia, kirolak, lurraldeak eta beste zenbait gai ukitzen ditu.

[Dantzarietako batzuk, ongi merezitako atsedena hartzen, Gure Ametzaren urtebetze ekitaldiak euren jauzi eta erritmoen kolorez edertu ondoren]

Aurkezpen horrekin batera, Euskal Etxera bildutakoek elkartearen 15 urteotako bizitza irudietan zeharkatzen zuen dokumental bat ikusi zuten, barnean lehendabiziko lehendakari eta bazkide sortzaile izan zen Imanol Bilbaoren agur hitzak. Jarraian, eskertze diplomak banatu zitzaizkien Berta Ascacibar eta Imanol Bilbao bazkide sortzaileei. Euskal Etxeko Gazteria Sailak ere oroigarri bat eman zion Bilbao familiari, hamabost urteotan etengabeko laguntzaile izateagatik.

Zorionak, Gure Ametza!