euskalkultura.eus

Rio Cuarto, Argentina. San Inazio eguneko bezperan inauguratu da Cordoba probintziako Rio Cuarto hirian 'Euskal Herria Plaza'. Ekitaldiari hasiera emateko, Villa Mariako Valentin Gortari dantzariak Aurreskua dantzatu zien hiriko, probintziako eta Argentinako Euskal Erakundeen Federazioko agintariei. Musika jotzearen ardura, berriz, Cordoba hiriburuko Jose Noe Fernandez Brizuela txistulariarena izan zen. Bi gazte hauek propio bidaiatu ziren Rio Cuartora zeremonia honetan parte hartzera.  

FEVAren izenean, Ricardo Basterra lehendakaria izan zen ekitaldian eta bildutako jendeari hitz batzuk zuzendu zizkion. Euskal Herritik etorritako immigranteek Argentina handi zedin izan zuten garrantzia azpimarratu zuen Basterrak bere diskurtsoan; horretaz gain, Rio Cuartoko euskaldunak euskal kultura zabaltzen jarraitzera animatu zituen.

[Plazaren proiektuaren sotzaile Eduardo Aguirrek hitz batzuk esan zizkion bildutako jendeari]

Ondoren, Marisa Arias Cordoba probintziako gobernuko ordezkariak zorion beroak eman zizkien euskal etxeko kideei Gure Ametza jaio zenetik egindako lanagatik, eta erakundeko sortzaileak, batez ere Bilbao familia, gogora ekarri zituen. Hizlarien artean, etxeko kide eta plazaren proiektuaren egilea den Eduardo Aguirre ere aipatu behar da. Plazaren helburu nagusia euskal kultura hedatzea bada ere, berdegunea kultura guztiei eta komunitate osoari irekita egongo dela azpimarratu zuen Aguirrek.

[Ekitaldian, Rio Cuartoko Euskal Etxean jaio berria den dantza taldeak pieza batzuk dantzatu zituen, lehendabizikoz jende aurrean]

Zeremoniarekin bukatzeko bertako Euskal Etxean jaio berria den dantza taldeak dantza emanaldi bat eskaini zion publikoari. Jende aurreko lehenengo dantzaldi honetan, Gure Ametza-ko dantzariek Fandango, Arin Arin eta Zazpi Jauzi interpretatu zituzten. Inaugurazioa bukatuta, Mikel Ezkerrok hitzaldi bat eman zuen euskal etxearen egoitzan.