euskalkultura.eus

Buenos Aires, Argentina. Udalbide/udalbiltza-ko Bixente Arozena hautetsiak joan den astean EuskalKultura.com-en iragarri genuen egitaraua segitzen zuen bitartean (Ruper Ordorika, Xamar, Jose Angel Irigarai eta Pamielako Pello Elzabururekin), joan den asteartean iritsi zen Buenos Airesera Ramuntxo Camblong lapurtarra, hau ere Udalbide/Udalbiltzako Zuzendaritza Batzordeko kidea, egun hauetan Argentina-Uruguain dabilen ordezkaritza horrekin bat egitekotan. Eguerdi aldean, Camblong-ek Buenos Airesko Iparraldeko Euskal Etxea-Centro Vasco Francés bisitatu zuen, bertako idazkari eta kultura arloko buruzagi den Norma Riosekin. Euskal Etxea erakutsi zioten eta bereziki mintzatu zen historia argentinar euskaldunaz Mikel Ezkerrorekin.

Izan ere, Camblong familia aldetik arras lotua dago Argentinako Diasporarekin, ahaide zuzena baita eta eragin zuzena izan baitute bere familiak eta sortetxeak Argentinan oso ezaguna eta ospetsua izan zen Juan Bautista Istilart inbentorearekin, hura ere Ramuntxo Camblong-en etxe berean jaioa, Makea-Hazparnen.

[Iparraldeko Euskal Etxean, besteak beste, aukera izan du Ramuntxo Camblongek azkenaldian Buenos Airesen bizi diren Paxkal Teyllagorri eta Elorri Larzabal gazteak agurtzeko (Mattin Larzabal irratilari eta euskaltzale baxenabartar ezagutuaren alaba da Elorri). Argazkian mementu hori, ezkerrean Mikel Ezkerro so]

[Ramuntxo Camblong Mikel Ezkerroren euskal immigrazioari buruzko esanak entzuten]

Iparraldeko Euskal Etxea bisitatu ondoren --eta matea dastatu ostean, hori egiteko gutizia eta interesa baitzuen-- Buenos Airesko Mexiko 1880 kalean dagoen euskal egoitzara eraman zuten Camblong, bertan dauden Eusko Kultur Etxea (Eusketxe), Euskaltzaleak elkartea eta Ekin argitaletxe historikoa ezagut zitzan. Euskara eskolak ematen diren ikasgelak ikusi zituen, ondoren euskal etxera itzultzeko eta bertan Carlos Martinez, Eduardo Torry Mendioroz eta Leandro Etchichury-rekin bildu eta iritziak trukatzeko. Hori eta gero argentinar hiriburuko Laurak Bat euskal etxe dekanora joan ziren, berau bisitatu eta bertako ezagutza zuzena izateko.

[Iparraldeko Euskal Etxean eta oro har Euskal komunitatean kultur ekile diren Leandro Etchichury (erdian) eta Juan Carlos Ibarrola (eskuin), eta argazkian agertzen ez diren beste zenbait lagunekin bildurik, tartean Norma Riosekin]

[Mexiko 1880ko euskal egoitzan, Eusketxeko Irene Lopez de Vicuñari 3.000 zenbaki bete berriak dituen Baionako 'Herria' astekariaren zenbait ale ematen (besteak beste Herriako sustatzaile eta Administrazio Kontseiluko kide ere bada-eta Ramuntxo Camblong).

[Etxeko ixtorioetan hainbestetan aipatzen entzundako 'mate' argentinarra dastatzen Iparraldeko Euskal Etxeko 'kintxo'an, pilotarien begiradapean]

Bitartean, euskal ordezkaritzaren beste partea Montevideon zen --datozen egunotan eman nahi genuke EuskalKultura.com-en Uruguaiko berri--, asteazken goizean buenosaireseratzeko. Asteazken eguerdian argentinar hiriburuan bildurik, bat egin zuten Ramuntxo Camblongek eta Arozena-Orodorika-Xamar-Irigarai-Elzaburuk,  Bahia Blanca aldera abiatzeko, bertan atzo gauez eta gaur bidaia honetan eskaintzen ibili diren saioak eskaini behar baitzituzten, gehienbat Ruper Ordorikaren emanaldia, eta Xamar eta Jose Angel Irigarairen 'Vascos' eta '7 poetas vascos' liburuen aurkezpenak Pamiela argitaletxeko Pello Elzabururen eskutik, Udalbide/Udalbiltzak lagundutako erdal itzulpenean Xamarren lana.

[Ramuntxo Camblong eta Bixente Arozena Udalbide/Udalbiltzako kideak Buenos Airesko Iparraldeko Euskal Etxean, elkarte hau 1895an sortu zuten kide fundatzaileen izen zerrenda, argazki eta plakaren ondoan (argazkiak Norma Ríos, EuskalKultura.com-entzat)]

Lotura interesgarriak

Udalbide, Euskal Udalen Elkarlan Elkartea
www.udalbide.net

Udalbiltza ofiziala
www.udalbiltza.eu

Pamiela argitaletxe iruindarra
www.pamiela.com