euskalkultura.eus

Montreal, Quebec. Euskaldunak Euskal Etxeak Inauteri Jaiaren baitan ongi etorria eman zion martxoaren 3an Adelaide Daraspek eta Christophe Paviak sortutako ikuskizunari. Bertan Manolo Alcayaga joaldun hendaiarrak --Bidasoako joaldunak taldeko kideak-- antzinako ohitura honi buruz hitz egin zien elkarteko kideei eta joaldunen jantzia erakutsi zien. Alcayaga "Zortzi"-ren emanaldian parte hartzeko etorria zen Quebec-era.

Azalpenaren ondotik Christophe Paviak bere orrazkera artistikoak egin zizkien hala nahi izan zuten elkarteko kideei. Jaiari amaiera emateko elkarteko dantzariek erakustaldia egin zuten.

[Euskal Etxeko kideak eta "Zortzi" ikuskizuneko artistak (argazkia Photograph'ink)]

Ikuskizun harrigarria Rialton

"Hura, ordea, ekimen nagusiaren aurrekaria baizik ez zen izan", azaldu dio EuskalKultura.com-i Adelaide Daraspek. Izan ere, martxoaren 7an "Zortzi" Rialto antzokian aurkeztu zuten, Euskal Etxeko bazkideak partaide. "Ikuskizunaren helburua Euskal Herriko Inauteriak ikuspuntu berritzaile eta moderno batetik aurkeztea zen", adierazi du Daraspek.

Ikuskizuna bideo emanaldi batekin hasi zen eta ondoren Manolo Alcayaga joaldunak hartu zuen agertokia, eta joarearen soinuak bete zuen Quebec-eko antzokia. Jarraian, Christophek joaldunen txanoetan oinarrituriko orrazkerak egin zituen eta zazpi txano aurkeztu zituen. Zortzigarrena Donapaleuko Kilimon joaldun taldeko Bernadette Leizagoyenek egina da.

[Zortzi ikuskizuneko "joaldunak" Rialto antzokiko taulagainean (argazkia Photograph'ink)]

[Christophe Pavia artista orrazkera bat egiten Rialtoko ikuskizunean (argazkia Photograph'ink)]

Emanaldiari bukaera emanez, euskal etxeko dantzariek Lantzeko Inauterietako dantza bat dantzatu zuten. Ikuskizunak harrera bikaina izan zuen eta Adelaidek, Christophek eta Manolok ikusleen galderei luze eta zabal erantzun zieten.

New Yorken ere

Quebecetik New Yorkerako jauzia egin zuen proiektuak. Martxoaren 9an Daraspek Quebec-eko eta Kanadako euskaldunei buruzko hitzaldia eman zuen Euzko Etxean, eta, bidenabar, "Zortzi" proiektuaren berri eman zuen. Manolo Alcayagak joaldunen jantzi eta tekniken erakustaldia eman zuen eta Christophe Paviak elkarteko lau neska orraztu zituen.  

[Adelaide Daraspe Central Park-en (argazkia Photograph'ink)]

Ikuskizunak New Yorkeko kaleetan ere izan zuen islarik, izan ere, Manhattango bizilagun bat baino gehiago zur eta lur gelditu zitzaien Adelaideri eta bere orrazkera ikusgarriari begira. "Ekimen hau Euskal Kultur Erakundearen laguntzari esker gauzatu ahal izan dugu. Eskerrik asko euren babesagatik!", amaitu du Daraspek.