euskalkultura.eus

Jose C. Paz, Argentina. Toki Eder euskal etxearen hasiera eta garapenaren lekukoa izan den Buenos Aires probintziako Jose C. Paz hiria, bertako euskal erakundearen 15. urtemugaren gertalekua ere izan da. Joan den ekainaren 7an izandako urtebetetzea 12an ospatu dute Toki Eder-eko arduradun eta lagunek Altube Klubean; eta janari tipiko baten inguruan, euskal dantzez eta musika ikuskizunez gozatu ahal izan ziren gonbidatu guztiak.

[Jose C. Pazeko Gure Etxe Alai Dantza Taldea (argazkia EE)]

"Gure dantza taldea gailendu egin zen urtebetetzeko jaian”, adierazi dio euskal etxeko lehendakari Maria Angeles Oñederrak EuskalKultura.com-i. “Zulma Aldabe irakaslearen gidaritzapean, Txapeloas, Lantz-eko Inauteriak, Fandango eta Arin-Arin interpretatu zituzten gure dantzariek”, kontatu digu Oñederrak. Eta Jose C. Paz-eko euskaldunek ez ezik, inguru herrietako euskal etxeetako ordezkariek ere izan zuten Toki Eder-entzat hain garrantzitsua den data ospatzeko aukera.

[Suipacha, Gral. Rodriguez eta Buenos Aireseko Laurak Bat-eko ordezkariek topa egin zuten Toki Eder euskal etxeko kideekin (argazkia EE)]

“Hamabost urte ditu gure euskal etxeak, eta harro gaude gure baitan Euskal Herrian bertan jaioak diren hainbat lagun izateagatik. Haiei esker mantentzen dugu euskaldunen muina. Horrek ez du esan nahi atzera begira gaudenik; proiektuz betetako etorkizuna dugu guk, herriarentzat zuzenduta dauden hainbat proiektu”. Hitz hauekin eman zizkien eskerrak Oñederrak festara bertaratu zirenei, tartean, Hermansoloña GKEaren bidez oñatiarren laguntza jasotzen duten erakundeen arduradunei.