euskalkultura.eus

Poznan, Polonia. Jai giroan ospatu du Poznango Unibertsitateak 2011ko Euskal Astea, iazkoa Islandiako sumendiaren erupzioa dela eta bertan behera gelditu ondoren. "Sumendiaren errautsengatik Europako aire-esparrua itxi egin zuten eta ezin izan genuen jaia egin", azaldu dio EuskalKultura.com-i Amaia Dones gasteiztarrak.

"Aurten aldiz, egin dugu jaia eta oso ondo joan da. Jende askok parte hartu du, euskal ikasleak ez direnak ere". Euskal Astearen ekitaldiak Poznanen eta Gniezno hirian egin dira.

Bost urtez euskara ikasten

Poznango Unibertsitatean hizkuntzalaritza ikasleek euskara espezializazio hizkuntza gisa ikas dezakete, hau da, bost urtez derrigorrezko ikasgai bezala hartzen dute. "Horrek lan asko egiteko aukera ematen digu eta bost urteren buruan maila oso ona eskuratzen dute", azaltzen du irakasleak. Bizkaiko Foru Aldundiaren babesa du ikastaroak eta horren bitartez urtean bitan Poloniako ikasleek Euskal Herrira bidaia egin ohi izan dute, euskara barnetegietan lantzeko.

Datorren urtetik aurrera euskara ikastaroa Etxepare Institutuaren irakurle programan sartuko da. Hain zuzen ere, Etxepareko Euskararen Sustatzeko zuzendaria, Mari Jose Olaziregi, Poznanen izan zen Euskal Astean eta Literaturari buruzko hitzaldi bat eskaini zuen.

[Euskal Astearen inaugurazio ekitaldian hitzaldiak entzutera bildu ziren ikasleak (argazkia ADones)]

Ipuinak euskaratzen

Literaturak tarte zabala izan du euskal egun hauetan, eta Amaia Donesek bereziki azpimarratzen du ikasleen parte hartzea. "Bego Montorio itzultzailea hemen izan zen eta itzulpengintza lantegi bat egin zuen bostgarren mailakoekin. Oso ondo egiten dute euskaraz eta Begoren laguntzarekin euskal idazleen ipuinak itzuli zituzten. Euskal Astean ipuinak irakurri zituzten hemengo taberna batean eta jende asko bildu zen, bertan zegoen jendeak ere jakinmina izan zuelako", azaltzen du.

Ikasleen euskara maila onari esker Euskal Asteko beste ekitaldi bat ikasleek beraiek -euskaraz- egin zituzten hitzaldi eta aurkezpenak izan ziren. "Ordubeteko hitzaldia egin zuen ikasle bakoitzak, eurek prestatutako gai baten inguruan", dio Amaiak. Horrez gain, zine emanaldiak, dantza ikastaroak, txalaparta erakustaldia eta beste ekitaldi batzuk egin ziren.

[Literatur irakurraldia Poznango Unibertsitateko 2011ko Euskal Astean (argazkia ADones)]

Esperientzia bikaina

Amaia Dones pozik agertzen da Euskal Astearen emaitzarekin, eta orohar, Polonian euskara irakastearekin. "Oso esperientzia ona da. Hemen ikasleek maila oso ona lortzen duten. Aurten Bostgarren urtea bukatuko duten bost ikasleek maila oso ona dute, eta lehendabiziko kurtsoan zortzi ikasle hasi dira. Hizkuntzalaritza ikasleek karrerako espezializazio bezala hizkuntza 'arraro' asko dituzte aukeran, Asiakoak eta. Askok euskara zer den ere ez dakite aukeratzen dutenean, baina bukaerarako engantxatu egiten dira", dio Amaiak. 

Ikasle hauez gain Amaiak Espainiar Filologia egiten duten ikasleei ere irakasten die euskaraz, baina kasu honetan hautazko ikasgai gisa. Lan faltarik ez du beraz, eta esperientzia biziki ari da gozatzen: "Niretzako hemen euskara irakastea plazer izugarria da. Euskal Herritik atera eta munduko geure txoko hori zer den erakustea esperientzia aparta da".