Poloniako Poznan hiriko hamar lagunek osatutako talde bat Zeberioko barnetegian dabil euskara ikasle

Otsailaren 3an hasita, eta datorren igandera bitartean, Poloniako hamar gazte euskara ikasten ari dira Zeberioko (Bizkaia) barnetegi batean, paisaia, kultura eta Euskal Herriko jendea ezagutzen duten bitartean. Joseba Perez da beraien irakaslea eta egonaldian ikasleek 60 ikastordu jasoko dituzte guztira, goiz eta arratsaldez. EuskalKultura.com-ek bertako bi ikaslerekin hitz egin ahal izan du, Justyna eta Paulina. Eurak, gainerako zortzi neskekin batera Baiona bisitatuko dute gaur. Hurrengo egunetan Donostia eta Iruñea ere bisitatzeko planak dauzkate.

Ulibarri Euskaltegia 2004an hasi zen Poloniako ikasleak hartzen euskara ikastarotan. Egunotan, Poloniako hamar neskek osatutako taldea dago bertan, denak Poznan Unibertsitatetik etorriak. Otsailaren 3an sartu ziren Zeberiora, euskara ikasteko eta ohiturak, festak eta Euskal Herriko herriak gertutik ezagutzeko. EuskalKultura.com-ek euretako biren iritziak jaso ditu --Paulina Bank eta Justyna Hadas-- klase arteko atsedenetako batean.

Oso gustura daudela Bizkaian esan digute. «Oso ondo ari gara pasatzen. Euskaraz irakurtzen, idazten eta ariketak egiten aritzen gara klaseetan», adierazten du Paulinak euskaraz. «Inguruan daukagun paisaia politakl ere lagundu egiten du», gehitzen du Justynak. Lehenengoak lau urte daramatza Gasteizen ikasten, Euskal Herriko Unibertsitatean (EHU). «Poznango Unibertsitatean hasi nintzen euskara ikasten eta Euskal Herrira etortzeko aukera sortu zen», aitortzen du. Bigarrenaren istorioa ezberdina da: «Bilbon egon nintzen Erasmus bekaren bidez ZientziaPolitikoak ikasten. Bertan erdaraz edo euskaraz ikasteko aukera genuen eta nik bigarrena aukeratu nuen. Horrela sortu zitzaidan barnetegi honetara etortzeko aukera», aipatzen du ikasleak.

[Poloniar ikasleak euskarazko ariketak egiten Zeberioko barnetegian]

Aukera bazter ezina

Talde ezohikoa dira eta motibazio handia daukate hizkuntzekiko. Barnetegian dauden gehienek lau hizkuntza menperatzen dituzte, euskaraz gain: ingelesa, frantsesa, gaztelania, poloniera eta, Paulinaren kasuan, portugesa. Justynari deigarria gertatu zitzaion euskararen zailtasun maila. «Hasieran zaila gerta daitekeen hizkuntza bat da euskara. Eta horrexek berak erakarri ninduen. Oraintxe oso gustura nabil», azpimarratzen du ikasleak. Paulinak, ordea, euskalkiekin dauzka komeriak, baina orokorrean logika ikusten dio hizkuntzari: «Nire kasuan, gero eta errazago egiten ari zait. Hala ere, gauza bat da euskara batua eta beste bat euskalkiak», erizten dio.

[Poloniako ikasleek giroaz gozatzeko aukera dute ere]

Bigarren barnetegia da Justynarentzat. Honi erizten dio euskara hobeto ikasten den tokia izatea eta hurrengo urtean itzultzea gustatuko litzaioke «bazter ezina den aukera bat delako». Paulinak, ostera, lau urte daramatza Gasteizen ikasten eta aurten amaituko ditu ikasketak, nahiz eta «Euskal Herrira itzultzeko intentzioa» duen. Gauzak horrela, bi gazte hauek, euren zortzi ikaskideekin batera, euskara-maila altuagoarekin itzuliko dira Poloniara eta, zergatik ez, bihotzean eramango dute Euskal Herriarentzat hain garrantzitsua den hizkuntza.

Lotura interesgarriak

Ulibarri euskaltegia
www.ulibarri.org

HABEk eta FEVAk antolatutako udako euskara barnetegiaren amaiera
2008ko urtarrilaren 1ean EuskalKultura.com-en argitara emana

euskalkultura.eus

Albisteak

Poloniako Poznan hiriko hamar lagunek osatutako talde bat Zeberioko barnetegian dabil euskara ikasle

Irakurrienak

Azken komentarioak