euskalkultura.eus

Tandil, Argentina. Iazko Euskal Astean eta FEVAren babesarekin aurkeztu zuen Itziar Aguirre sukaldari euskal argentinarrak ‘Pilpileando Argentina’ programa. Proiektu gastronomiko honen helburua, sukaldaritza klaseak ematearekin batera, elkartasuna da, euskal-argentinar gizataldearen ekarpen sozial solidarioa bideratzea, ‘Pequeños Gestos’ fundazioarekin lankide izanez.

Hainbat herri eta euskal etxe bilakatu dira azarotik hona ‘Pilpileando’ ekitaldiaren egoitza, tartean Necocheako Euzko Etxea, Buenos Airesko Laurak Bat, La Platako Euszko Etxea eta Lapridako Lagunen Etxea, batzuk aipatzearren. Orain, Tandilgo Gure Etxearen txanda da eta Esteban Kain erakundeko lehendakariak EuskalKultura.com-i adierazi dionez, ekimena, Udal Interesekoa izan da izendatua apirilaren 13an, 1255. dekretuaren bidez.

Aurreko emanaldietan bezala, hiru plater -sarrera, nagusia eta postrea- prestatuko ditu sukaldariak ordu eta erdiko klasean. Bertaratzen direnek sarrera-txartela eurenganatzeko uzten dituzten donazio eta materialak Chaco probintzian behar handietan bizi diren familien artean banatuko dira Patricia Sosa abeslari argentinarrak kudeatzen duen ‘Pequeños Gestos’ fundazioaren bidez.  

‘Pilpileando’-ren partaide eta laguntzaile izateko, higiene pertsonalerako materialen truke lor daitezke sarrerak. Hauek aldez aurretik euskal etxeko egoitzan eskura daitezke, Sarmiento kaleko 1079. zenbakian, arratsaldeko 4etatik 8etara. Telefonoz (02293 4422800 zenbakian) eta emailez (gureetxea@speedy.com.ar) ere badago euskal etxe antolatzailearekin kontaktatzerik. Dohaintzei dagokienez, erakundetik adierazi dute ez dela beharrezkoa klasean presente egotea ekarpena eskaintzeko.