euskalkultura.eus

Pergamino, Argentina. 60. urteurrenaren urtean ekintza anitzeko egitaraua prestatzen ari dira Pergaminoko Lagun Onak euskal etxeko kideak. Urtebetetzearen poza komunitate osoarekin konpartitzeko asmoarekin, garai guztietako dantzari ohien topaketa egingo dute ekainaren 18an. “Dantzak, abestiak, janari gozoa eta oroipen politak batuko dituen erromeria izango da”, azaldu diote euskal etxetik EuskalKultura.com-i.

Jaia euskal etxeko egoitzan izango da, 9 de julio kaleko 835. zenbakian, eta joateko asmoa dutenek euren partaidetza konfirma dezakete lagunonakpergamino@yahoo.com.ar helbidera idatziz edo telefonoz zenbaki honetara deituz: 02477-426707.

UEU Pergaminoko euskal etxean

Ospakizunen testuinguruan, Argentinako Udako Euskal Unibertsitateko irakasleei irekiko dizkie ateak Pergaminoko Lagun Onak-ek. Ekainaren 24an, arratsaldeko 8etan eta Hector M. Gutierrez hiriko alkatearen hitzekin hasiko dira bi egunez luzatuko diren jardunaldiak.

UEUko ikastaroaren programa eta ordutegiak, hauexek izango dira:

Ostirala, ekainaren 24a

-18:00etan: Hasiera. Hector Gutierrez alkate, Julio de Sautu euskal etxeko lehendakari eta Enrique Aranburu UEUko arduradunaren ongi etorri hitzak
-18.30etan: “Euskaldunen misterioa”,  Mikel Ezkerro hizlari
-19.30etan: “Euskaldunen jatorria”, Jorge Beramendi hizlari
-20.15etan: “Euskal Herriko itsaslapurreta”, Jorge Otaño hizlari

Larunbata, ekainaren 25a

-09.30etan: “2012ko Udako euskal Unibertsitatea”, Enrique Aramburu
-10.00etan: “Iparralde, bere literatura eta musikaren bidez”, Carlos A. Irisarri 

-10.45etan: Atsedena

-11.00etan: “Euskal estatua”, Pedro Beramendi
-11.45etan: “Euskadunak Pergaminon” Jorge Beramendi
-12.30etan: Eztabaida eta amaiera

Ekimena irekia da, komunitate osoari zuzendua eta dohainik. Partehartzaileei agiriak emango zaizkie.

Pergaminoko “Ahotsak”

Baina komunitateari begirako ekintzak ez dira hasiko aste honetan. Izan ere, euskal etxea ordezkatzen duen “Ahotsak” abesbatza ibilbide polita egiten ari da azken bolada honetan. Euren azken kontzertua Uruguain izan da, Bella Union herrian hain zuzen. Martin Aguilar-ek zuzentzen dituen kantariek La Plata ibaia zeharkatu zuten, errepertorio oparoa eskaintzeko Uruguaiko aipatu herri horren 186. urtemugan.

[Pergaminoko Lagun Onak euskal etxeko Ahotsak abesbatzako kideak Uruguain]

Kontzertuan bertako beste musika talde batzuekin konpartitu zuten agertokia “Ahotsak”eko kideek eta ikuskizunaren arrakastaren karietara, datozen jaietan parte hartzeko gonbitea jaso dute Pergaminoko abeslariek Artigas Departamenduko Kultura Zuzendariaren partetik.