euskalkultura.eus

Pergamino, Argentina. Urtero antolatzen dute ‘Eusko Azoka’ delakoa Pergaminoko Lagun Onak euskal etxekoek. Aurten aukeratutako datak abuztuaren 18a eta 19a izan dira, ostirala eta larunbata, hain zuzen. Bi egunotan, proposamen ugari eskaini zitzaizkien 9 de Julio kaleko egoitzara gerturatu ziren bazkide eta lagunei.

Lehenengo egunean, uztailaren 18a, Gernikari buruzko argazki erakusketa zabaldu zen euskal etxean. Bonbardaketa ondorengo eta egungo Gernikaren irudiak ikus zitezkeen argazkietan. Leku berean, euskararen stand-a muntatu zen, jendeak euskaldunon hizkuntz zaharrari neurria har ziezaion, edo askoren kasuan lehenengo kontaktua izan zezan. Azokako erakusmahaien artean, euskal etxeko liburutegiarenak interes handia sortu zuen. Gauza bera gertatu zen bertaratutakoen eskura jarritako beste kultur material eta oroigarriekin.

Emate-ekintza eta euskal taberna

Egun berean, Euskal Etxeko Zuzendaritza 1 zenbakidun Eskola Teknikora (Eskola Industrial ohia) hurbildu zen, Eusko Jaurlaritzak ikastetxeari emandako fresatzeko makina baten emate-ekintza ofizialari ekiteko.. Tramankulua lortzen kudeatzaile ibili den Cesar Arrondo ere bertan zen; baita Marta Abarrategui FEVAko idazkaria, Noemí Moisello Zabaleta Arrecifeseko Euskal Etxeko idazkaria eta Juan Andrés Arregui ere Lagun Onak Euskal Etxeko zuzendariekin batera. Lehenengo azoka eguna ahitzeko, Euskal Etxeko abesbatzak jardun hunkigarria eskaini zuen eta ondoren, ikertzailea eta La Platako Unibertsitate Nazionaleko Historia irakaslea den Arrondok “Gernika hoy” izeneko hitzaldia eman zuen.

Larunbatean, azkenik, Azokaren ateak publikoak 'euskal taberna' tipiko batean parte har zezan zabaldu ziren. Euskal errezetak dastatzeaz gain, ikusleek Etxeko dantzarien aurkezpena ere ikusi zuten. Dantzariek, bereziki txikienak atera zirenean, txalo-zaparrada polita jaso zuten.