Donostia-San Sebastián. Nork ez ditu ezagutzen Pirritx, Porrotx eta Mari Motots? Edo Takolo, Pirritx eta Porrotx? Euskal Herriko pailazo ezagunenek 37 urte daramatzate euskal haurrak liluratzen euren abesti, ipuin eta ikuskizunekin; eta euren ekarpen "infinitua"n Diasporara ere iritsi dira, nola ez. Euskara klaseetan, txikientzako tailer eta topaketetan, eta erromerietan. Nork ez ditu abestu hainbat aldiz ‘Maite Zaitut’ edo ‘Euri tanta’? Euskal Etxeek ere izango dute aukera bat egiteko maiatzaren 3an Pirritx, Porrotx eta Mari Motots-i Euskal Herrian egingo zaien omenaldian.
Deia luzatzen zaie Diasporako haurrei eta euren gurasoei 'Maite Zaitut' kantu ezaguna bideoz grabatu eta bidali dezaten, irudion bidez omenaldian parte hartzeko
Maite Zaitut Elkartea Euskal Herri mailako omenaldi erraldoia ari da antolatzen pailazoek ia lau hamarkada hauetan zehar emandakoa eskertzeko. Eta hitzordu ahaztezin batera deitzen dute Bizkaia Arena BEC-en, 14.000 jende biltzea helburu, tartean hamaika lagun musikari, abeslari, dantzari, antzerkigile, artista plastiko eta bertsolari, pailazoen abesti eta istorio ikonikoetan oinarritutako unibertso magikoa berreraikiz.
'Maite zaitut'en bideoklipa, nola ikusten duzu zeure burua kantua kantatu eta bidaltzen?
Maite Zaitut-ek Diasporako haur, gazte eta gurasoengana jotzen du eta zuzenean eskatzen die ekitaldi honetan partaide izan daitezen, proposamen jakin bat eginez: bakoitza bere herriko euskal etxean elkartzea eta bideo bat grabatzea “Maite zaitut” kantatzen. Bideoaren amaieran, denok batera oihukatu behar dute: “Argentinatik… Txiletik… Bruselatik… (dauden herrialdea aipatuz) maite zaituztegu!”. Bideoa info@nikeremaitezaitut.eus helbidera bidali behar da, ahal dela apirilean zehar.
Argazkiak pailazoekin
Era berean, gogora dezagun pailazoak ibiliak direla Diasporan bertako haurrak bisitatzen eta, edonola ere, norbaitek pailazoekin ateratako argazkirik balu, nikeremaitezaitut.eus atarira igotzea eskatzen zaio. “Asmoa ahal bezainbeste argazki pilatzea da, garai desberdinetakoak” azaltzen dute antolatzaileek. Bideoak sare sozialetara igoko dituzte; argazkiak, BECen proiektatuko dira omenaldiaren egunean.
Lagun bati bidali
Komentarioa gehitu
