euskalkultura.eus

"40 urte baino gehiago egin ditut hanka bakoitza ozeanoaren alde batean nuela, baina nire oroimena beti itzultzen da Euskal Herriko mendi berdeetara, eta abestietara...", idatzi zuen Miguel Marinak bere azken urteetan. 1936ko gerraren ostean Frantzian, Venezuela, Dominikar Errepublikan eta AEBetan erbesteratua, deserriratuen esperientzia eta samina nabari dira Marinaren artean. Bihar bere lanari eskainitako erakusketa inauguratuko da Bilbon.

Bilbao, Bizkaia. Miguel Marina margolariari buruzko erakusketa inauguratuko du bihar Bizkaia Jaurreriko Abokatuen Bazkunak, Eusko Jaurlaritza, BBK Fundazioa eta Washingtoneko Unibertsitatearen lankidetzarekin. Inaugurazioaren aurretik, Marinaren bizitza eta lanari buruzko mahai-ingurua egingo da.

Mahai-inguruaren moderatzaile izango da Asier Vallejo, Kanpoan diren Euskal Gizataldeentzako zuzendaria. Partehartzaileak honakoak izango dira: Noemí de Haro (Universidad Autónoma de Madrid), Constance Marina, margolariaren alaba, eta Anthony L. Geist (University of Washington).

Nazio Batuetan margolari

Miguel Marina Barredo Bilbon jaio zen 1915an. Gerra zibila hasi zenean Errepublikar ejerzitoko kapitain izendatu zuten. Euskal Herrian egin zuen borroka, eta Bilbo galdu zenean Bartzelonara joan zen. Handik, guda amaitu zenean, Frantziara egin zuen ihes, eta gero Venezuelan, Dominikar Errepublikan eta AEBetan erbesteratu zen. New Yorken Madeline Cooper-ekin ezkondu eta bere alaba Constance jaio zen.