Chivilcoy, Argentina. Buenos Aires probintziako Chivilcoyko herrian, Udalak, herriko Beti Aurrera Euskal Etxeak eta omenduaren familiak elkarrekin sustatutako ekimenean, bertan jaiotako Jose Goñi, "El Porteño" (1873-1930) ezizeneko pilotari handiari izen horixe ezarri dio herriko kaleetako bati, 500. kaleari, Tomaso etorbidetik Ituzaingó kaleraino doan tartean. Lehenengo euskal pilotako mundu-txapelduna izan zen euskaldunen seme zen chivilcoytar aui, eta aurten bere jaiotzaren 150. urteurrena betetzen dela-eta baliatuz egin zaio aspaldidanik zor zitzaion gorazarre keinu hau.
Chivilcoyko Guillermo Britos intendentea buru zela, pilotariaren izena zeramatzaten plaken desestaltze ekitaldiak omendutakoaren senideak, udal funtzionario eta zinegotziak, Goñiaren familiako kideak eta euskal komunitatearen ordezkaritza bildu zuen irailaren 16an, Beti Aurrera Euskal Etxeko Zuzendaritza Batzordeko kideak eta Euskal Herriko eta Argentinako banderadunak ere tartean, Euskal Etxeko dantzari batek ohorezko aurreskua dantzatuz, euskal modu berezi hau erabiliz, omendu zuen pilotari euskal-argentinarraren figura eta ekarria.
Kaleari plaka berria esttrreinatzeko ekitaldia, Chivilcoyko intendente Guillermo Britos buru
Kalearen plaka berria hurbilagotik. Aurten 150 bete dira 'Porteño' Chivilcoyn jaio zela
Intendetea, familiako eta herriko Euskal Etxeko kideak plakaren azpian unea betirakotuz
José Goñi Erostarbe "El Porteño" Chivilcoy-n jaio zen 1873ko abuztuaren batean, eta txiki-txikitatik izan zen pilotazale eta ondoren pilotan aritu zen, 1900ean Parisko Erakusketa Unibertsal Handian munduko lehenengo euskal pilota txapeldun argentinarra izatea lortu arte. Haren iloba, Pedro Juan Goñi, kalea izendatzeko proiektuaren sustatzaile handia, ekitaldian partaide izan zen. Hitza hartu zuenean, intendentearekin eta Beti Aurrera Euskal Etxekoekin batera, eskerrak eman zizkien agintariei "Porteño"ri bere jaioterriak aspaldidanik zor zion kale-izendapen eta orotza hau gauzatzeagatik.
Lagun bati bidali
Komentarioa gehitu
