euskalkultura.eus

Donostia-San Sebastián. Gabon Gaua joan da eta aurten ere Olentzero Euskal Herriko neskamutilen etxeetan opariak banatzen ibili da jo eta su. Diasporako euskal etxeetara ere heldu zen eta handik datozkigu hainabt argazki, bideo eta kronika. Jarraian horietako batzuk bildu ditugu.

Murtzian, Euskal Etxeak antolatu zuen Gabonetako jaian ohorezko gonbidatuak ez zuen kale egin eta elkarteko kideak bazkaltzen ari zirela hara agertu zen Olentzero, oparien zaku eta guzti! Elkarteko txikiak zur eta lur gelditu ziren ikazkina elkartean sartzen ikusi zutenean, euskal etxeak argitaratu duen bideo honetan ikus daitekeenez. Eta umeak harrituta, baina adi ere gurasoen aurpegiei: ze ilusio etxeko txikiak egun honetako zirrara lehen aldiz bizitzen ikustea!

AEBetan Boiseko Henar Chicok bere blogean bildu ditu zenbait euskal etxetako Gabonetako festen irudiak, horien artean Washington DCko Euskal Etxeak egin zuen jaiko irudiak (Mark Bieterrenak dira argazkiak).

[Olentzero Washingtongo Euskal Etxeko txikiekin solasean, patxadan (argazkia MarkBieter)]

AEBetan ere Rhode Islandeko Euskal Etxeak Gabonak euskal erara ospatu zituen eta hara ere bildu zen Olentzero, elkarteko txikiak agurtzeko gogoz.

[Rhode Islandeko neskamutilek ez dute berehala ahaztuko Olentzeri agertu zitzaien unea! (argazkia RhodeIslandEE)]

Eta, gaurkoz amaitzeko, Mexiko DFko Euskal Etxearen jaiko irudiak ere bildu ditugu. Urtero legez, hantxe izan zen Olentzero eta pazientziaz eta goxo goxo, elkarteko txikiak altzoan hartu eta euren eskariak entzun zituen. Ondoren, elkarteko nagusiekin argazkia ateratzeko astia ere izan zuen.

[Mexiko DFko Olentzero elkarteko neskatila baten opari eskariak entzuten (argazkia MexikoEE)]

[Horiek irriparrak! Elkarteko nagusiak ere gustura asko hurbildu ziren Olentzerorengana (argazkia MexikoEE)]