euskalkultura.eus

Euskal Herriko mendiak. Gaur ostiral arratsean iritsiko da Montevideora Olentzero, munduko ikazkinik ospetsuena eta Gabonetako euskal tradizioaren protagonista. Ilusio handiz, haur eta helduek 20etan emango diote ongietorria Haize Hegoaren egoitzan. Gabon gaueko topa-egitea baino ordu gutxi lehenago helduko da, Argentinako eta mundu osoko hainbat euskal etxetatik igaro ondoren. Atzo bertan Chascomusen izan zen. Paseoan, herriko kaleak zeharkatu zituen Zingirako Euskaldunak Euskal Etxeraino heldu aurretik, bertako askoren harrituaraziz. Haur asko zituen zain, tartean zenbait galtzagorri, festari alaitasuna eta kolorea emanez.

Argentinan bere birak hainbat toki jo zituen, Atlantikoko kostaldetik hasita. Necochean, abenduaren 1ean, gozokiak barra-barra banatu zituen Txikientzako Sukaldaritza Tailerraren azken topaketan. Marcia Barnaba euskara ikaslearen eskutik, Gabonetako gailetatxoak prestatu zituzten Olentzerok eta haurrek. Euzko Etxean izan ondoren, Lapridara abiatu zen. Mari Domingirekin batera, abenduaren 3an iritsi zen Lagunen Etxera, elkartearen urteurrena eta Euskararen Eguna ospatzera. Zain zeuden neska-mutilek, baita helduek ere, gozokiak jaso zituzten, eta batzuk ikatza ere bai. Larunbatean, Olentzero eta Mari Domingi Viedmara iritsi ziren pintxoak dastatzera, Aberri Etxeko lagunekin jolastera eta dantzatzera. Ordutik astebetera, Tandilen ibili zen ikazkina, Gure Etxeak antolatutako jaiotzan parte hartuz.

Quebec-etik Australiara, Mexiko eta AEBn barrena

Baina kontinente askotako leku gehiagotik ere deitu diote. Kanadan, goiztiar, Montrealgo Quebec-eko Euskaldunak Euskal Etxea bisitatu zuen abenduaren 3an. Egun berean Australiako North Queensland Basque Clubetik ere igaro zen, Townsvillen. Ostiralean, abenduaren 15ean, Ameriketako Estatu Batuetako Boisen egin zioten harrera. Ikastolako haurrek etxea maitasunez apaindu zuten, eroso sentiarazteko. Eta gauza beretsua pasatu da, esaterako, Palma Mallorcakoan, Montpellierren, Madril, Paris, Londres eta Bordeleko euskal etxeetan. Hala ere, hainbeste bidaia egin arren, bira amaitzetik urrun dago. Larunbatean, abenduaren 23an, txokolate bero eta txurroekin espero dute Mexiko Hiriko Euskal Etxean eta, nola ez, euskaldunen etxe askotan Gabon gauean bertan. Eskerrik asko, Olentzero!