euskalkultura.eus

New Orleans, AEB. Louisiana Basque-American Society & Cultural Organization (LABASCO) elkarteak Aberri Eguna ospatuko du datorren apirilaren 20an, afari batekin eta hainbat kultur ekitaldiekin. Euskal Etxea Louisiana estatuko euskaldunen bilgunea da eta New Orleans hiri ezaguna du topagune. Bertako euskal komunitatea ez da Idaho eta Kaliforniakoak bezain ezaguna, baina LABASCOko sortzaile Michel-Antoine Goitia-Nicolás ikertzaileak dionez aspaldikoa eta sendoa da, izan ere "1698an heldu ziren aurreneko euskaldunak".

Aberri Eguneko festa New Orleanseko Galvez jatetxean egingo da eta 14:00tan hasiko da, bi dokumentalen emanaldiarekin: "Orson Welles in the Basque Country" eta "Ama Lur". Ondoren, dantza erakustaldia egingo da, bertako "Komenka Ethnic Dance & Music Ensemble" taldearekin, euskal dantza batzuk eta bertako folklorea eskainiz.

Alkateak eta piratak

Ondoren, Lousianako euskaldunen historiari buruzko hitzaldia emango du Michel-Antoine Goitia-Nicolásek. Gai honetan luze eta zabal ikertu du elantxobetarren ondorengo honek, eta bere esanetan "Cajun asko eta frantziar eta espainiar creole-ak egiaz euskaldunak dira", dio. "Kolonia garaiko Lousianako bederatzi gobernadore euskaldunak izan ziren, Louisianako aurreneko gotzain katolikoa ere; euskal jatorriko alkate asko izan dira, horien artean Etienne Mauleon, New Orleanseko aurreneko alkatea; baionarra zen Jean Seguin, New Orleanseko portua sortu zuena; Ajubitarrak, hasieratik Misisipi ibaian kapitainak izan zirenak, eta baita Jean Lafitte eta makina bat pirata ere". Pertsonaia eta familia hauei guztiei buruz hitz egingo du hitzaldian Goitia-Nicolásek. 

Eguna amaitzeko, afaria eta ikuskizunen ordua helduko da 19:00tatik aurrera. Afariaren menuan euskal-creol erako janaria zerbitzatuko da. "Ezin da New Orleansen jan euskal-creol familien ekarpena aintzat hartu gabe: Begue, Tujague, Galatoire, Casenave, Esparbe, Maylie eta Dufossat familiena, esaterako", segurtatzen du Goitia-Nicolásek. Afariaren prezioa 60 dolarrekoa da (50 dolar LABASCOko kide direnentzat). Tokia mugatua denez, antolatzaileek lehenbailehen erreserbatzea gomendatzen dute. Horretarako, jarri jatetxearekin harremanetan edo idatzi elkarteari e-maila, hona.

-Elkartearen webgunea, hauxe