New Jerseyko egunkariak euskal sukaldaritzaren sekretuen bila, bertako euskal sukaldarien laguntzarekin

Star Ledger egunkari estatubatuarrak euskal sukaldaritzaren arrakasta izan du hizpide joan den astean. Gero eta nazioarteko oihartzun eta onespen handiagoa jasotzen ari da euskal gastronomia eta bere sekretuak ezagutzeko asmoz egunkariak New Jersey estatuan bizi eta lana egiten duten hiru sukaldari euskal-amerikarrengana jo du: Gema Aurre, Newarkeko Casa Vasca jatetxekoa; Carlos Izaguirre, Cherri Hill-eko La Campagna Restaurant-ekoa eta Ignacio Cenicacelaya, Dover-eko Jai Alai jatetxearen jabea. Artikuluan islatutakoetako batzuk laburbildu ditugu datozen lerroetara.

'Euskaldunak oso sutsuak gara gure sukaldaritzarekin', azaltzen du artikuluan Gema Aurre, Newarkeko Casa Vasca jatetxeko jabeak. Aurre Bizkaian hazi zen eta bere sukaldaritzan etxeko plater klasikoak dira nagusi. 'Euskal Herrian bazkari bakoitza besteekin ospatzeko aukera bat da. Bisitan zoazenean, ezagunen batek egingo duen lehen gauza bazkaltzera gonbidatea da beti', dio. 'Sukaldaritza berria eta zaharra dago, baina sekretua kalitatezko produktuak erabiltzea eta kontu handiz prestatzea da'.

Carlos Izaguirre, Cherry Hillseko La Campagne jatetxeko chef-a, euskal jatorriduna da eta euskal sukaldaritza ikastaro bat ematen du bertan. 'Oso ezaguna den euskal produktu bat Baionako urdaiazpikoa da. Bere zaporea oso berezia da, txerriek gaztainak jaten dituztelako. Gaztain saltsa, arkumea edota arrainak laguntzeko pureetan ere erabiltzen da', aipatzen du. Izaguirrek euskal sukaldaritzak hondarreko aldian aldaketak bizi izan dituela onartzen du, baina oinarriak berdinak direla dio. 'Garai batean pobreen sukaldaritza zela esaten zuten, baina orain ez. Eta merkatu etnikoen eta internet zabaltzearekin erraza da horrelako sukaldaritzarako produktu freskuak eskuratzea'.

Bakailaoaren sekretuak

Bakailaoa pil-pilean euskal sukaldaritzako klasiko bat da. Bakailaoa emeki-emeki egiten da, olio eta baratxuritan. Aurrek azaltzen duenez prestatzeko aski xinplea ematen du, baina 'zaila da, tenperatura perfektua lortu behar delako eta lapikoa kontu handiz astindu behar delako saltsa ondo egin ahal izateko'.

'Gutxienez, 50 edo 60 era daude bakailaoa prestatzeko', azaltzen du Iñaki Cenicacelayak, Doverreko Jai Alai jatetxeko jabeak. Cenicacelaya sukaldari familia batean hazitakoa da eta bere ustez Euskal Herriko arrainek zapore berezia dute. 'Atlantikoko eta Bizkaiko Golkoko uren nahasketagatik da. Urak oxigeno gehiago du eta horrek zapore gehiago ematen dio arrainari'.

Cenicacelayak azaltzen duenez euskal sukaldaritzaren benetako edertasuna oso naturala eta organikoa da. 'Jakien benetako zaporeari ateratzen uzten diogu, esku artean lehengai onak dituzunean gauza gutxi egin behar baitira. Eta ez dugu urik erabiltzen, baizik eta ardoa, cognac-a edo brandy-a erabiltzen ditugu saltsak egiteko'. Aholku eta errezeta hauei jarraiki, arrakasta aparta lortzen dute hiru jatetxeok New Jersey aldean.

Lotura interesgarriak

Artikulua orijinala (ingelesez)
www.nj.com

Casa Vasca, Newark
En http://www.bridgeandtunnelclub.com

La Campagne, Cherry Hill
www.lacampagne.com

Jai Alai, Dover
www.jaialairestaurant.com

euskalkultura.eus

Albisteak

New Jerseyko egunkariak euskal sukaldaritzaren sekretuen bila, bertako euskal sukaldarien laguntzarekin

Irakurrienak

Azken komentarioak