euskalkultura.eus

Urte hasierako ekintza nagusiak batu ditu Necocheako Euskal Etxeak. San Sebastian Eguna Gizataldeen Jaiaren agertokian ospatu zuten, danborrada jotzen, eta horren ostean, hurrengo asteburuan, beste hiru jai egun izan zituzten euren egoitzan: sagardotegi gaua, pintxo eguna eta 2018ko Sansebastianak ixteko, erromeria.

Necochea, Argentina. Argentinako euskal etxe gehienak udako atsedenaldiaz gozatzen ari diren bitartean, euskal necocheatarrek oso goiz ekin diete ekintzei aurten ere. Hiriko Gizataldeen Jaialdia urtarrilaren 19tik 21era luzatu zen eta Euzko Etxeak sukaldaritza txokoa eta musika ikuskizuna eskaini zituen festan.

Azken hiru hamarkadetan urtero egin ohi duen bezala, San Sebastian Eguna ospatu zuen elkarteak, bere egoitzan garatu zuen hiru eguneko programa batekin: urtarrilaren 25ean, Eneko Sagardotegiak bere ateak ireki zituen eta sagardotegien menu tipikoa prestatu zuen. Afaria animatzeko, Osasuna Otxoteak euskal abesti tradizionalak kantatu zituen. Egitarauarekin jarraituz, urtarrilaren 26an Donostiako Konstituzio Plazaren itxura hartu zuen Euskal Etxeko jai aretoak eta mota askotako pintxoak dastatu ahal izan zituzten bertan bildu zirenek.

San Sebastian eguneko erromeria erabat jendetsua bizi izan zuten Mar del Plata, Rosario, Chascomus, La Plata, Bahia Blanca, San Nicolas, Laprida, Arrecifes, Lomas de Zamora eta Gral. Las Heras hirietako euskal etxeetako ordezkariak lagun. Euskalherritar batzuek ere hartu zuen parte Argentinan uda peto petoan ospatzen den San Sebastian festan.

Urteko lehenengo erromeria honetan, etxeko musikariek berriro jo zituzten danborrak, Gazte Alai taldeko neska-mutilek dantza tipikoak dantzatu zituzten eta batzordeko agintariek elkarteko alkate berria hautatu zuten 2018 urterako. Ohorea Hugo Picardik jaso zuen eta aginte makila lagun eta ahaideez inguratuta jaso zuen 91 urteko etxeko kideak.

Hiriko hedabideek bat egin zuten ospakizunarekin eta jaira bertaratzeaz gain elkarrizketa egin zioten Arantxa Zubillaga Etxeko kideari: