euskalkultura.eus

Donostia, Gipuzkoa. 2006ko Euskararen Nazioarteko Egunaren bueltan sortu zituen Eusko Ikaskuntzak euskararen arloan urtean zehar nabarmendu diren Euskal Herritik kanpoko erakundeei zuzendutako ENE Sariak, euskararen unibertsaltasuna aldarrikatuz. Euskal Herritik kanpo euskara sustatzeko lanetan diharduen edozein erakunde izan daiteke hautagai. Euskal hizkuntza eta horren adierazpideak zabaltzeko lana hartzen da euskara sustatzeko lantzat: irakaskuntza, literatura idatzia, ahozkoa, zinea... eta sortze lan oro. Hautagaitzak aurkezteko epea azaroaren 27an amaituko da eta epaia, berriz, abenduaren 3an, Euskararen Nazioarteko Egunean, emango da. Nestor Basterretxeak diseinatutako eta eratutako anagramaren burdin eta altzairu herdoilgaitzezko erreprodukzio bat jasoko du irabazleak, baita jendaurreko aitortza publikoa ere.

Parte hartzeko oinarriak:

- Parte hartu nahi duten erakundeek beren jardueraren laburpen bat bidali behar dute EuskoSarera (info@euskosare.org). Laburpen horrek gehienez A-4 neurriko bost orri izango ditu, eta bertan Epaimahaiak kontuan hartzeko interesgarri irudituko zaizkien xehetasun guztiak azalduko dituzte: erakundearen sorrera data; euskararen inguruan urtean burutzen dituzten ekintzak; ikasle kopurua, hala badagokio; argitalpenak eta antzekoak; lorturiko goraipamenak eta sariak; eta abar.

- Euskal Herritik at euskara sustatu, lagundu edota bultzatzen duen edozein erakundek har dezake parte. Euskara eta bere espresio bideak hedatzeko saioak eta ahaleginak hartuko dira euskara sustatzeko lantzat: irakaskuntza, literatura idatzia, ahozkoa, zinea… eta sortze lan oro.

- Epaimahaia: Eusko Ikaskuntzak izendatuko duen Epaimahai batek hartuko du erabakia. Baloratzeko orduan, Epaimahaiak alderdi kuantitatiboak eta kualitatiboak hartuko ditu kontuan, sustapen ideietan ageri den berritasunarekin batera.

Aurreko edizioetan Argentinako Mar del Platako 'Artaburu' Euskara Taldeak (2006) eta Kataluniako Bartzelonako Euskal Etxeak (2007) jaso dute saria.

Lotura interesgarriak

-ENE Sariaren baldintza guztiak Eusko Ikaskuntzaren webgunean
-ENE Sariaren baldintzak EuskoSareren webgunean