Elizondo, Nafarroa. Duela hilabete batzuk, Memoriaren Nafarroako Institutuak Nafarroako erbestearen behin-behineko errolda argitaratu zuen, 1936ko kolpe militarraren ondorioz erbestera joan behar izan zuten nafarren zerrenda emanez. Erbesteratu horiek guztiak gogoratu eta omentzeko, Nafarroako Gobernuak ekitaldi bat egingo du datorren igandean, irailaren 19an, Elizondon, eguerdiko 12ean, Foru Plazan eta Santiago Karrikako 13. zenbakian, 2020ko abenduan memoriaren puntu gisa eskultura inauguratu zen tokian.
Mikel Iriarte artistaren 'Babesaren muga' izena duen eskultura, jatorritik urruneko lurralde batean harrera hartutako pertsona erbesteratuari egindako omenaldia da. Babesa eta aterpea eskaini dituztenak ere aintzat hartzen ditu, baita ere euren segurtasuna arriskuan ipinita elkartasun sareetan parte hartu eta ihesi zihoazenei muga zeharkatzen lagundu zieten pertsona guztiak. Goiko argazkian ikus daitekeenez, Iriarteren eskulturak Berdaitz mendixkako mugarriari egiten dio erreferentzia 117. zenbakiarekin, gehien erabilitako pasabideetako bat baitzen.
Nafarroako Memoriaren Institutuak ekitaldian parte hartzeko gonbitea luzatu die interesa duten senitarteko eta gertuko guztiei. Garrantzitsua da, baina, aldez aurretik kontaktatzea prebisioak egiteko. Interesatuek inm@navarra.es helbidera idatz dezakete, gai bezala "Nafarroako erbesteari omenaldia" jarrita. Emailaren gorputzean, zenbat pertsona diren behar dute adierazi, baita erbesteratutako senideen datuak ere. Horrela, gonbidapena jaso eta eserlekua erreserbatuta izan ahalko dute.
Baina telefonoz ere egin daiteke, 848 426 021 zenbakira deituta.
Lagun bati bidali
Komentarioa gehitu
