euskalkultura.eus

Iruñea-Pamplona, Nafarroa. Crisanto Ayanz-ena izan zen atzokoan Nafarroako Gobernuan eman zituen kondekorfazioen artean, pertsona fisiko bati emadako bakarra, gainerako hiruak elkarteei eman baitzitzaizkien.

Nafarroako Karlos III.a Prestuaren gurutzea emateko arrazoiak aipatzerakoan, Gobernuak Crisanto Ayanzen lana nabarmendu zuen, hauxe esanez: "Argentinan bizi diren nafarrei eta nafarren ondorengoei arreta emateagatik eta han daudenen ordezkari izateko lan goresgarria egiteagatik [eman diogu]. Horrek, gainera, pertsona horiek Foru Erkidegoarekin duten lotura eta Nafarroaren irudi ona indartzen lagundu du".

Nafarroako Elikagai Bankuari dagokionez, gurutzea eman dio "solidarioak izatearren eta lanean etengabe aritzearren askotariko arrazoiak direla-eta egoera ezegonkorrean bizi diren eta elikagaiak erosteko dirurik ez duten pertsona eta familientzako elikagaiak biltzeko".

Nafarroako Esku Elkartuak edo Manos Unidas-Navarraren inguruan esan zuen "problezia, gosea, malnutrizioa, gaixotasunak, eskolatzerik eza eta azpigarapena bezalako munduko arazo larriei erantzun aktiboak eta eraginkorrak" ematen lagundu duela, baita Foru Erkidegoan ere.

Gizakia Helburu Fundazioaren kasuan, Gobernuak "pertsona ugariren drogazaletasunaren arazoari irtenbide eraginkorrak emateko egindako ahalegina eta, alor horretan, gizarte bazterkeriari aurre egin izana" eskertu zuen.

-Crisanto Ayanzen ohar biografikoa. Hor ipintzen duenaz aparte, Buenos Airesko 'Euskal Echea' elkarteko (Asociación Cultural y Benéfica Euskal Echea) batzordekide ordezkoa da, argentinar hiriburuko Nafarroako Etxearen izenean