Lyon, Frantzia. Hasi berri du Lyon hiriko Euskal Etxeak Musa ikasteko bere tailerra. Otsailaren 19an Talle Crayon tabernan egindako lehenengo saioan 12 lagunek hartu zuten parte eta hiru orduz jokoaren arauak landu eta partida batzuk jokatu zituzten. “Jende berria ezagutzeko aukera ere izan genuen, plan ederra suertatu zen” adierazi dute euskal etxe frantseseko kideek. Muslarien hurrengo bilera martxoan izango da, seguruenik hilak 19.
Urte osoko egitarauari begira, martxoan eta apirilean jarraituko dute mus klaseek eta barne lehiaketek, ondoren, apirilaren 5ean eta 6an lyondar bikote eta lagun batzuk Montpellierrera bidaiatu eta bertako euskal elkartearen Mus Txapelketan parte hartuko dutelarik. Ekainaren 7an eta 8an, 'Jules Maisterrena' 5. Pilota Txapelketarekin bat egingo du Lyoneko euskal gizataldeak eta kirol ekitaldiarekin batera frontoiaren 10. urteurrena ere ospatuko dute. Hiriko musika bandek joko dute eta sarrerak doakoak izango dira. Txapelketan izena emateko epea irekita dago. Informazio gehiago, hemen.
Lyon Handiko Villeurbane herrian egingo den 'Jules Maisterrena' Pilota Txapelketako kartela
Lyoneko Euskal Etxea beste proposamen batzuk aztertzen ari da urteko programari emandatzeko, baina segurutzat jotzen da urtearen bigarren zatian, Euskal Etxearen 5. urteurrena ospatuko dutela, urrian, eta abenduaren 3an, aurreko urteetan bezala, Euskararen Nazioarteko Eguna (ENE) ospatuko dutela, aurten ere Euskararen Eguneko Poteoa antolatuz Lyoneko karriketan.
Gogora dezagun Lyoneko Euskal Etxea 2020an sortu zutela hirian eta inguruan bizi diren euskaldunek eta euskal kulturaren lagunek, eta euskal elkarte apala bada ere, bost urte hauetan hainbat ekintza egin dituztela eskualdean euskal kultura zabaltzeko, batzuk Montpellierreko eta Marseillako euskal etxeekin batera, etengabeko elkarlan hitzarmena baitaukate, besteak beste elkarrekin 'Hiruak Bat' buletina plazaratuz. Lyoneko Euskal Etxeari lagundu nahi badiozu, hemen kidetu zaitezke.
Lyoneko Euskal Etxea sareetan
- Instagram, maisonbasquedelyon
- Facebook, La Maison Basque de Lyon - Lyoneko Euskal Etxea
Lagun bati bidali
Komentarioa gehitu
