euskalkultura.eus

Donostia-San Sebastián. Munduko euskal etxeen fitxategi osatua, nazioartean banatutako euskal elkarteetarako sarbidea mapa bidez zein klik egiteko zerrenda bidez, hori da EuskalKultura.com-ek bere webguneari gehitu edo emendatu dion zerbitzu berria. Aurretik biltzen zuen munduko euskal etxe webgunedunen zerrendari emandako urrats berria da, dagoeneko Estatu Batuetako kasuan euskaraz eta ingelesez eskaintzen genuena eta orain mundu osorako zabaldu duguna.

Bereizkeriarik gabe bildu ditugu bertara euskal etxetzat jo ditugun elkarte edo erakundeak. Batetik, Eusko Jaurlaritzak ofizialki euskal etxetzat onarturik dauzkan elkarteak; bestetik, zerrenda horretan ez egon arren, euren burua euskal etxetzat jo eta euskaldunen biltoki direnak; baita ere, azkenik, euren burua nafar etxetzat aurkezten duten etxeak, gure izenburuak dioenez, gure arloa euskal kultur arloa baita eta zalantzarik ez baitugu nafar etxeetatik ere euskal kultura lagundu eta biziarazten dela.

Datozen asteetan segituko dugu urratsak ematen, sail eta baliabide berriak eskainiz eta gure irakurleek etengabe egiten dizkiguten galde eta eskakizunei geure indarren araberako erantzun egokiak ematen. Adi beraz. Bistan da, oraingo sail berria, webgune osoa  bezala, beta fasean, proba fasean dagoela oraindik. Emaizkiguzu egun batzuk eta ondoren, ikus ditzakezun akatsen berri emaiguzu mesedez, irakurle.

Lotura interesgarriak

Euskal Etxeen baliabide berria
http://www.euskalkultura.com/baliabideak