euskalkultura.eus

Bilbao, Bizkaia. About Basque Country Blog eta A Basque in Boise blogei esker jakin dugu Euskadiessencial aplikazioaren berri. De Paso Publicaciones enpresa bizkaitarrak plazatu du mugikorrentzako gida, eta berari esker Euskal Herriko zenbait eskualde ezagutu nahi dituzten bisitariek telefonoetan zuzenean ikusi ahalko dute informazioa. Gidak jatetxe, hotel eta leku interesgarrien zerrenda ohikoaz gain, beste aukera baliagarri batzuk ere eskaintzen ditu, hala nola, bidaia prestatzeko atala, ibilbideak, bidaiaren egutegia eta bidaia bera interneten partekatzeko aukera.

Aplikazioa smartphone eta Ipad gailuentzako garatu du enpresak eta gaztelaniaz, ingelesez eta frantsesez erabil daiteke. Aplikazioa deskargatzeko jo hona. Oraingoz, Araba, Bizkaia eta  Gipuzkoako informazioa eskaintzen du soilik. EuskalKultura.com De Pasorekin harremanetan jarri da eta gida beste euskal herrialdetara zabaltzeko asmoa agertu dute arduradunek.

Milioi bat irakurle

De Paso Publicaciones enpresak turismo giden munduan esperientzia zabala du. 1994ean hasi zen enpresa arlo honetan, euskal hoteletan banatzen den Euskadiessencial (paperezkoa) gida egiten. Gaur egun Euskal Autonomi Erkidegoko 3, 4 eta 5 izarretako hoteletako 7.500 gelatan banatzen da gida, eta urtean zehar milioi bat irakurletik gora duela azaltzen dute arduradunek.