euskalkultura.eus

Montevideo, Uruguai. Hiriburu uruguaitarreko 'Euskal Erria' Euskal Etxearen egoitzak ateak ireki egin zituen joan den asteburuan Ondarearen Egunaren ospakizunak direla eta.

Larunbatean eta igandean euskal etxeko bazkideek bisitariei ongi etorria egin zieten, besteak beste euskal abizenei eta heraldikari buruzko informazioa emanez.

Horrez gain bisitariek 'Euskal Herria Lau Haizetara' dokumental saileko irudiak ikusteko aukera izan zuten, Euskal Herriko bazterrak airetik ateratako ikuspegi harrigarri hauen bidez ia bertatik-bertara ezagutzeko.

Elkarteak pilota erakustaldi bat ere antolatu zuen eta egoitzako tabernan pintxo dastaketa egin zuten.