euskalkultura.eus

Mar del Plata, Argentina.  Denak Bat Euskal Etxeak bere sorreraren 65 urteak ospatu ditu uztailean zehar, ekitaldi egitarau mardularekin. Ospakizunei bukaera emanez, afaria egin zuten elkarteko kide eta lagunek joan den uztailaren 19an eta eurekin batera bertan izan ziren urteurren hau ospatu nahi izan zuten herriko agintari eta hiritar ugari.

Afaria girotzeko Euskal Etxeko Beti Alai dantza taldeak euskal dantza erakustaldia eskaini zuen. Eszenatokian dantzari txiki, ertain eta nagusiek euskal dantza eta kulturarekiko maitasuna eta engaiamendua erakutsi zuten. 

Afari honekin bukatu ziren Denak Bateko 65. urteurreneko ekitaldiak, hilean zehar Argentinako hiri honetara euskal kulturaren alderdi desberdinak ekarri dituztenak: gizon eta emakumezkoen pilota partidak, mintzaldiak, bideo emanaldiak, erakusketak eta adin guztientzako jarduera eta jokoak, besteak beste.