euskalkultura.eus

Mar del Plata, Argentina. Iluntzeko 8etan hasi zen emanaldia hondartzaren aurrean dagoen kapera ederrean. Denak Bat Euskal Etxe anfitrioiko lehendakariak, Jose Martin Azarlozak, ongi etorria eman zion publikoari eta berehala ekin zioten koruek kontzertuari. Francisco Mensaren zuzendaritzapean, Villa Mercedesko Euskal Etxeari atxikitako 'Camerata de la Luna' taldeak Aita Gurea, Agur Itziarko, Aitonaren Esana, Amaiur, Gaur akelarre Gorbeian, Quién fuera como el jazmín eta La nochera kantatu zituzten, kantu horiekin batera Calle angosta ere abestuz, azken hau oso bertsio berezi eta aipagarrian. Izan ere, Villa Mercedes hiriko ereserkia den Calle angosta, gaztelania zein euskara tartekatzen zuten testuekin egin zuten abeslariek.

Villamercedestarren ondotik, eta Irina Taraborelli zuzendari, Tandilgo Euskal Etxeko 'Gure Abestiak' abesbatzaren txanda izan zen. Tandildarrek, Irina Taraborelli zuzendari --ohiko zuzendari Martin Tumbarinoren lekua hartu zuen, honek ezin izan baitzuen etorri--, Ogi zerutik, Goizeko izarra, Burden dawn, Ator, Ator, Aurtxo seaskan, Soy de Santurce eta Ilunabarra interpretatu zituzten.

Errezitalari amaiera emateko, Horacio Lanci zuzendari duen Mar del Plata bertako Unibertsitateko 'Camerata Vocal' taldeko kantariek Maria Elena Walsh egile argentinarraren Serenara para la tierra de uno abesti klasikoa interpretatu zuten. Jarraian, Requiem aeternam – Sanctus eta Kyrie-Gloria egin zituzten. Hiru abesbatzek txalo ugari jaso zituzten. Hona elkarretaratzeak eman zuenaren argazki eta bideo kronika:

[San Luis probintziatik partaide,'Camerata de la Luna' abesbatza, Villa Mercedesko Euskal Etxeari atxikitako korala;]

[Ekarpen berezia eginez, Villa Mercedesko 'Camerata de la Luna' abesbatzak 'Calle angosta' abestiaren euskarazko bertsioa egin zuen]

[Francisco Mensa, Villa Mercedesko “Camerata de la Luna” abesbatza dotorearen zuzendaria]

[Tandilgo Euskal Etxeko 'Gure Abestiak' korala, euren txandari etekin ateratzen]

[Tandilgo Euskal Etxeko 'Gure Abestiak' ek, 'Haurtxoa seaskan' klasikoa abestu zuen beste zenbaiten artean]

[Martin Tumbarino da Tandilgo Euskal Etxeko 'Gure Abestiak' koruaren ohiko zuzendaria; ezin izan zuen Mar del Platara bildu eta bere lekuan Irina Taraborellik zuzendu zituen kantari tandilarrak errezitalean. Argazkian, Irina Taraborelli, Cecilia Artigue taldeko abeslariarekin, emanaldian kantuen aurkezpenak egin zituen pertsonarekin]

[Mar del Platako Unibertsitatetik heldu zen talde anfitrioia, 'Camerata Vocal' abesbatza]

[Mar del Platako Unibertsitateko “Camerata Vocal” taldeak “Serenata para la tierra de uno” interpretatu zuen]

[Mar del Platako Unibertsitateko “Camerata Vocal” taldeko zuzendaria den Horacio Lanci]